ورال قالاسىنىڭ اكىمدىگى 700 ادامدى جۇمىسپەن قامتىپ وتىرعان «كۋبلەي» زاۋىتىن جاپپاق. قر اۋىل شارۋاشىلىعى ۆيتسە-ءمينيسترى جەڭىس وسەربايدىڭ ايتۋىنشا، زاۋىت بقو-دا اۋىل شارۋاشىلىعىمەن اينالىسىپ وتىرعان جۇرتتىڭ باستى تابىس كوزى.

«كۋبلەي» جشس – 30 جىلدىق تاريحى بار ەت، بالىق جانە كوكونىس كونسەرۆىلەرىن وندىرەتىن ءىرى وتاندىق كاسىپورىنداردىڭ ءبىرى. كاسىپورىننىڭ ەت جانە ەت-وسىمدىك كونسەرۆىلەرىن وندىرۋدەگى ۇلەسى 65%-دى قۇرايدى. وسىلايشا، بۇل كاسىپورىن ىشكى نارىقتى ەت ونىمدەرىمەن قامتاماسىز ەتۋگە ىقپال ەتەدى. سونىمەن قاتار تەك قازاقستاندى عانا ەمەس، ونى وزبەكستانعا، قىرعىزستانعا، تاجىكستانعا جانە ت.ب. ەكسپورتتايدى. بۇگىنگى تاڭدا كونسەرۆىلەۋ زاۋىتى 100-دەن استام كونسەرۆىلەۋ ونىمدەرىن شىعارادى: ەت جانە كوكونىس، بالىق، دەليكاتەس، جەمىس-كوكونىس كونسەرۆىلەرى، تاۋىق كونسەرۆىلەرى، دايىن تۇسكى اس جانە ءسۇت كونسەرۆىلەرى. زاۋىت ءبىر اۋىسىمدا 200 مىڭ بانكا كونسەرۆىلەرىن شىعارۋعا قاۋقارلى. باتىس قازاقستان وبلىسىنىڭ 3 مىڭعا جۋىق شارۋا قوجالىعى كاسىپورىنعا ەت وتكىزەدى»، - دەدى جەڭىس وسەرباي.

«كۋبلەي» زاۋىتى زاماناۋي قۇرىلعىلارمەن تولىقتاي جابدىقتالعان. كاسىپورىن تاۋلىگىنە 70 تونناعا دەيىن كونسەرۆى ونىمدەرىن شىعارادى. باتىس قازاقستان وبلىسىندا 2021 جىلعى قاڭتار-قازان كەزەڭىندە وتكەن جىلدىڭ سايكەس كەزەڭىمەن سالىستىرعاندا ەت كونسەرۆىلەرىنىڭ ءوندىرىسى 26,1%-عا (3 418 توننادان 4 311 تونناعا دەيىن), ەت جانە وسىمدىك كونسەرۆىلەرىنىڭ ءوندىرىسى 46,8%-عا (405 توننادان 595 تونناعا دەيىن) ۇلعايعان.

حالىقتى جۇمىسپەن قامتاماسىز ەتىپ، تابىسىن ارتتىرىپ وتىرعان زاۋىتتى اكىمدىك جاۋىپ تاستاۋعا نەگە مۇددەلى بولىپ وتىر؟ ماسەلەنىڭ ءمانى مىنادا: ورال قالاسىنىڭ اكىمدىگى 2020 جىلى «كۋبلەي» زاۋىتىنىڭ جانىنان اكىمدىكتىڭ «تسيولكوۆسكي» تۇرعىن ءۇي كەشەنىن سالۋعا رۇقسات بەرەدى. 2014 جىلى بەكىتىلگەن قالانىڭ باس جوسپارىنا وزگەرىس ەنگىزگەن اكىمدىك 2020 جىلدىڭ مامىر ايىندا زاۋىتتىڭ سانيتارلىق قورعاۋ ايماعىنان كوپقاباتتى تۇرعىن ءۇي سالۋعا رۇقسات بەرەتىن قاۋلىنى شىعارادى.

زاڭگەر باقىتجان بازاربەك ورال قالاسى اكىمىنىڭ قاۋلىسى زاڭسىز شىعارىلعانىن ايتادى.

«ەندى سۋديا شەشىم شىعارۋدىڭ ورىنىنا تاراپتاردى تاتۋلاستىرۋ ساتىسىنا وتەمىز، شەشىم شىعارىلمايدى، بۇل ءىس قوعامدا ۇلكەن رەزونانس الدى، سوندىقتان دا تاتۋلاسۋ كەرەك دەيدى. ءبىلىپ تۇر، سوتتىڭ شەشىمىنەن كەيىن نە اربا سىنادى، نە وزگىز ولەدى. بۇل جەردە بەيتاراپ شەشىم جوق. ويتكەنى ورال قالاسى اكىمىنىڭ قاۋلىسى زاڭسىز شىعارىلعان. ۋاكىلەتتى ورگانداردىڭ كەلىسىمى جوق. ەگجەي-تەگجەيلى جوباسى ورال قالاسىنىڭ باس جوسپارىنا سايكەس بولۋى كەرەك. ساۋلەت-قالا قۇرىلىسى تۋرالى تالاپتارعا ساي ونەركاسىپتىك اۋماقتاردا تۇرعىن ءۇي سالۋعا تىيىم سالىنعان. زاڭنىڭ اتى زاڭ عوي ەندى.  قورشاعان ورتانى قورعاۋ سحەماسى جوق، ەگجەي-تەگجەيلى جوسپاردى دايىنداۋ تاپسىرماسى جوق، نەگىزگى ۋاكىلەتتى ورگاننىڭ قورىتىندىسى بولۋى كەرەك، 8-9 ۋاكىلەتتى ورگاننىڭ كەلىسىمى بولۋى كەرەك، قالا قۇرىلىسىنىڭ توپوگرافيالىق سۋرەتى بولۋى كەرەك، قالا قۇرىلىسى زونالارىن راستايتىن جوسپار بولۋى كەرەك. ودان بولەك، سانيتارلىق-ەپيدەميولوگيالىق قورىتىندى بولۋى كەرەك، ەكولوگيالىق ساراپتامانىڭ قورىتىندىسى بولۋى قاجەت. ەشنارسە جوق»،- دەيدى زاڭگەر.

اتىشۋلى قاۋلىنى 2020 جىلى ورال قالاسىنىڭ اكىمى بولعان ابات شىنىبەكوۆ شىعارعان.

باقىتجان بازاربەك ورال قالاسىنىڭ اكىمى بولعان، قازىر بقو اكىمى اپپاراتىنىڭ جەتەكشىسى ابات شىنىبەكوۆتىڭ، بقو اكىمى بولعان عالي ەسقاليەۆتءىڭ ۇستىنەن، ورال قالاسى اكىمىنىڭ ورىنباسارى اسحات كۇلباەۆتىڭ ۇستىنەن ءىس قوزعايتىنىن مالىمدەدى.

كۋبلەي زاۋىتىنىڭ وكىلدەرى ەكى جىل بويى ورال قالاسىنىڭ اكىمدىگىمەن سوتتاسىپ ءجۇر. ولار اكىمدىككە، پروكۋراتۋراعا، مەملەكەتتىك ارحيتەكتۋرالىق-قۇرىلىس باقىلاۋ مەكەمەسىنە، قالالىق، وبلىستىق سوتقا ارىز ءتۇسىرىپ، اقىرىندا وڭ ناتيجەگە جەتەدى. وبلىستىق سوت 2020 جىلدىڭ 28 جەلتوقسانىندا سول كەزدە ورال قالاسىنىڭ اكىمى بولعان ابات شىنىبەكوۆتىڭ شىعارعان قاۋلىسىن نەگىزسىز دەپ تانيدى.

بىراق اكىمدىك سوتتىڭ شەشىمىن بەل ورتاسىنان باسىپ، بقو اكىمدىگىنە تىكەلەي قاراستى مەملەكەتتىك ارحيتەكتۋرالىق-قۇرىلىس باقىلاۋ مەكەمەسى «يرمەنوۆا» جەكە كاسىپكەرلىگىنە قۇرىلىس جۇمىسىن مونتاجداۋعا رۇقسات بەرەدى.

«2020 جىلى 28 جەلتوقسان كۇنى وبلىستىق سوتتىڭ شەشىمى شىققاننان كەيىن، عالي ەسقاليەۆكە تىكەلەي باعىناتىن مەملەكەتتىك ساۋلەت-قۇرىلىس باقىلاۋى باسقارماسى تۇرعىن ءۇيدى سالۋعا رۇقسات قۇجاتتامانى بەرە باستايدى. زاۋىتتىڭ 6 اي بويى بارماعان جەرى، قاقپاعان ەسىگى قالمادى. ەشكىم قارامايدى. وبلىستىق مەملەكەتتىك ساۋلەت-قۇرىلىس باقىلاۋى باسقارماسى التى اي بويى تەكسەرىستى اشپادى. سودان كەيىن، سول مەملەكەتتىك ساۋلەت-قۇرىلىس باقىلاۋ باسقارماسى باسشىسى جانە ەرمەنوۆتەردىڭ ءۇيىن دايىنداعان جوبالاۋ كومپانياسىنىڭ باسشىسى تۋعان اعايىندىلار بولىپ شىقتى. ولارعا قىلمىستىق ءىس قوزعاپ، تەرگەۋ كەرەك ەدى. بىراق، ونى جاي عانا قىزمەتتەن بوساتا سالعان. بىراق ەڭ كەلتىرىلگەن زالال قانداي؟ التى اي بويى تەكسەرىستى اشپاعاننان كەيىن، ەرمەنوۆتەر بۇكىل ءۇيدى سوعىپ، ءبىتىرىپ، ساتىپ جىبەرگەن»، - دەيدى باقىتجان بازاربەك.

اكىمدىكتىڭ زاڭسىز ءىس-ارەكەتىنەن تەك قانا زاۋىت ەمەس، پاتەردى ساتىپ العان تۇرعىندار دا زارداپ شەگىپ وتىر.

ال كاسىپورىن جانىنان ءۇي سالۋعا رۇقسات بەرگەن اكىمدىك زاۋىت 100 مەترلىك سانيتارلىق اۋماقتى بەكىتۋ ءۇشىن، الدىمەن جەرگىلىكتى اكىمدىككە ءوتىنىش جازۋى كەرەك ەدى دەگەندى ايتادى.

«جەر كودەكسىنىڭ 121 بابىنا سايكەس كۋبلەيدىڭ سانيتارلىق رەجيمى بەكىتىلمەگەن. 2015 جىلى سانيتارلىق شەشىمدى العان كەزدە جوبانى دايىنداپ قالا اكىمدىگىنىڭ قاۋلىسىمەن بەكىتۋ كەرەك ەدى. سول قاۋلىمەن بەكىتىلسە قۇرىلىس كومپانياسىنا رۇقسات بەرمەس ەدىك»، - دەيدى ورال قالاسى اكىمدىگىنىڭ مەملەكەتتىك-قۇقىقتىق ءبولىمىنىڭ باسشىسى ەربولات كاريموۆ.

بىراق زاڭگەر باقىتجان بازاربەك قر ۇلتتىق ەكونوميكا ءمينيسترىنىڭ بۇيىرىعى بويىنشا وندىرىستىك نىسانداردىڭ سانيتاريالىق-قورعانىش ايماعىن بەلگىلەۋ بويىنشا مۇنداي تالاپتار اكىمدىككە ءوتىنىش جازۋ ارقىلى بەكىتىلمەيتىنىن، بۇل تالاپتار ونسىز دا ارنايى ەرەجەمەن بەكىتىلىپ قويعانىن جەتكىزدى.

«اكىمدىكتىڭ ءبىر عانا ءۋاجى بار جانە ول نەگىزسىز. بۇل جەر كودەكسىنىڭ 121 بابىنىڭ 1-ءشى تارماعى. وندا ەگەر دە جەر مەملەكەتپەن بەرىلسە، وندا كاسىپورىننىڭ سانيتارلىق قورعاۋ ايماعىن اكىمدىك بەلگىلەيدى دەلىنگەن. بىراق جەر كودەكسى سانيتارلىق قورعاۋ ايماعىن رەتتەيتىن اكت ەمەس. ول تىكەلەي نورمالارعا سۇيەنەدى. ياعني، جەر كودەكسىنىڭ 121 بابى 4 تارماعى سانيتارلىق نورمالارعا سىلتەمە جاسايدى. بىزدە بەكىتىلگەن وندىرىستىك كاسىپورىنداردىڭ سانيتارلىق ايماعىن بەكىتۋ تۋرالى  نورما بار عوي. ول جەردە اكىم قاۋلى شىعارۋ كەرەك، «كۋبلەي» زاۋىتى اكىمگە ارىز بەرۋ كەرەك دەگەن ءسوز جوق. قايدان تاۋىپ العان دۇنيە؟ ويدان شىعارىلعان دۇنيەنى سوتتا ايتۋعا بولمايدى عوي.

سانيتارلىق نورمالاردا ناقتى جازىلعان، ەگەر دە وندىرىستىك كاسىپورىننىڭ قورىتىندىسى بولسا، بولدى. ءبىزدىڭ سانيتارلىق-ەپيدەميولوگيالىق قورىتىندىمىز بار»، - دەيدى زاڭگەر.

سونىمەن قاتار، زاڭگەر جوعارعى سوت توراعاسى جاقىپ اسانوۆتىڭ جالعان مالىمەتتى تەكسەرمەستەن سوتتىڭ شەشىمىن بۇزعانىن ايتتى.

سوت ءجۇرىپ جاتقاندا جوعارى سوت توراعاسى جاقىپ اسانوۆقا تۇرعىن ءۇيدىڭ يەلەرى ارىز بەرگەن. توراعا سوتتا ءۇشىنشى تاراپتىڭ پىكىرى تىڭدالۋ كەرەك دەگەن ۇسىنىس جىبەرەدى. سونداي-اق، ول ۇسىنىستا زاۋىتتىڭ نەگىزگى بولىگى بۇل اۋماقتا ەمەس، قالادان تىسقارى ورنالاسقان دەپ كورسەتىلەدى.

«جاقىپ اسانوۆ جالعان مالىمەتتەرگە قاراماستان، مالىمەتتەردى تەكسەرمەي كاسساتسيالىق ينستانتسياعا ۇسىنىس بەرەدى. سول ۇسىنىستىڭ ناتيجەسىندە ءبىزدىڭ پايدامىزعا شىعارىلعان وبلىستىق سوتتىڭ زاڭدى شەشىمى بۇزىلادى. ءسويتىپ، وسى قازىر بولىپ جاتقان سوتقا تۇسەدى.

ءبىزدىڭ اقپاراتىمىز بويىنشا، اسانوۆتىڭ ۇسىنىسىن دايىنداعان ونىڭ كەڭەسشىسى جانە سەكرەتارياتتىڭ باسشىسى. وندىستەگى سۋديا ءتيىستى قورىتىندى بەردى. بىراق ونى قابىلداماي قويىپ، اسانوۆ ءوزى ۇسىنىسقا قول قويىپ جىبەرگەن.  ءوزىنىڭ ۇسىنىسىندا ول «كۋبلەي» زاۋىتىنىڭ قازىر تۇرعان جەرىندە اكىمشىلىك عيمارات پەن ءبىر عانا تسەح بار دەپ كورسەتكەن. ال زاۋىتتىڭ ءوزى قالانىڭ سىرتىندا دەلىنگەن. بۇل جالعان مالىمەت.

ونىڭ ءبارىن ءبىز سوڭىنا دەيىن زەرتتەيمىز. بۇل ىسكە قاتىستى ءبارىنىڭ اتى-جوندەرىن بىلەمىز. اسانوۆتىڭ ءوزى جوعارى سوتتىڭ توراعاسى بولا وتىرىپ، قالاي قول قويىپ جىبەرگەن؟!

بىرەۋ ارام پيعىلمەن جالعان مالىمەتتەردى ۇسىنىسقا ەنگىزسە، شىنايىلىققا سايكەس كەلمەسە نە ءۇشىن جوعارى سوتتىڭ توراعاسى بولىپ وتىر؟»، - دەدى زاڭگەر باقىتجان بازاربەك.

ەگەر دە سوتتىڭ شەشىمى «كۋبەي» زاۋىتىڭ پايداسىنا شىعارىلماسا، 2024 جىلى زاۋىتقا ءتيىستى سانيتارلىق-ەپيدەميولوگيالىق قورىتىندى بەرىلمەيدى. بۇل دەگەنىمىز ەكولوگيالىق ساراپتامانىڭ قورىتىنىدىسى بولمايدى دەگەن ءسوز. ال بۇل قۇجاتتار بولماسا وندا تاۋارلارعا دەكلاراتسيا بەرىلمەيدى. ءدال وسى سەبەپتەن كەيىن «كۋبلەي» تاراپى سۋديا ايتقان ىمىراعا كەلە المايمىز دەپ ءتۇسىندىردى.

«سوتقا ىقپال ەتىپ وتىرعان كۇشتەردى ءبىلىپ وتىرمىز عوي. ءبىز ىمىراعا كەلمەيمىز. زاڭ ءبىزدىڭ پايدامىزدا. قانداي ىمىرا، كىممەن ىمىراعا كەلەمىز؟ اكىمدىكپەن با؟

ءبىز تۇرعىن ءۇي يەلەرىمەن سوتتاسىپ جاتقان جوقپىز. «كۋبلەي» زاۋىتى تىكەلەي  اكىمدىكپەن سوتتاسىپ جاتىر. ىمىرا بولمايدى. ءبىز سوڭىنا دەيىن بارامىز»، - دەپ ناقتىلادى «جەر اماناتى» كوميسسياسى توراعاسىنىڭ ءبىرىنشى ورىنباسارى، زاڭگەر باقىتجان بازاربەك.

ايتا كەتەيىك، ورال قالاسىنان 10 شاقىرىم جەردەگى دەركۋل كەنتىندە زاۋىتقا جەتكىزىلەتىن ەت جىلىكتەلەتىن قاساپحانا ورنالاسقان. ءدال سول جەردەگى تسەحقا 2,5 مىڭنان استام شارۋا قوجالىعى كۇن سايىن 250 ءىرى قارا مەن 7 مىڭ باس قويىن اكەپ ساتادى. سودان كەيىن مال دارىگەرلەرى ءتورت تۇلىكتى تۇگەل تەكسەرىپ، ارتىنشا مالدار سويىلادى. شارۋا قوجالىقتارى مالىمىزدى ساتىپ الاتىن وبلىستا باسقا ءىرى ەت كومبيناتى جوق دەيدى. ەگەر زاۋىت جابىلسا، ءۇنسىز قالمايمىز، ءبارىمىزدىڭ دە باس كوتەرۋىمىزگە تۋرا كەلەدى دەپ وتىر.

«اۋىلدا مال وتكىزۋدىڭ ءوزى پروبلەما. «كۋبلەي» كومپانياسى اشىلعالى بەرى اۋىلدىڭ شارۋا قوجالىقتارىنىڭ ءبارى وسى جەرگە كەلىپ مالدارىن وتكىزىپ جاتادى. سوندىقتان زاۋىتتىڭ جۇمىس ىستەپ تۇرعانى بۇل  باتىستاعى اعايىنعا ۇلكەن كومەك. «كۋبلەي» سياقتى ەت وڭدەيتىن كومبيناتتار جوق.

ءۇنسىز قالمايمىز ارينە، اۋىلدا ءوسىرىپ جاتقان مالىمىزدى قايدا جىبەرەمىز ءبىز؟»، - دەيدى «مۇقادەس» شارۋا قوجالىعىنىڭ جەتەكشىسى اقىلبەك تەمىربولاتۇلى.

ەتى مەن سۇيەگىن تسەحتا جۇمىس ىستەيتىن 300-گە جۋىق قاساپشى اجىراتىپ، ەتىن قالاداعى زاۋىتقا جەتكىزىپ كەلەدى.

«سويىلعان مالدىڭ ەت ونىمدەرى بورداقىلانىپ، سۇيەكتەن جىلىكتەلىنىپ، اجىراتىلادى. ءارى قاراي توڭازىتقىشقا سالىپ زاۋىتقا جەتكىزىلەدى. كۇنىنە زاۋىتقا 50 توننا ءونىم جىبەرەمىز»،-دەيدى «كۋبلەي» تسەحىنىڭ ءوندىرىس مەڭگەرۋشىسى جۇماعالي مەيرامبەك.

«بۇل كۋبلەيدە جۇمىس ىستەگەنىمە 8 جىلدان استى. مەنىڭ قولىمدا ديپلوم جوق، وسى «كۋبلەي» مەنى ءوسىردى، ءوندىردى. كوپ حالىقتىڭ اۋزىنان وسى «كۋبلەي» جابىلايىن دەپ جاتىر دەگەندى ەستيمىز. ەگەر جابىلسا مىڭنان استام ادام جۇمىسسىز قالادى. جۇمىس تابۋ قيىن ارينە، مىناداي جاقسى ايلىق ورال قالاسىندا جوق. تالابىم ءسوزىمنىڭ جوعارى جاققا جەتكەنىن قالايمىن، «كۋبلەي» زاۋىتىنىڭ جابىلعانىن قالامايمىن»،- دەدى قاساپشى امانجول ادەت.

ال قالاداعى زاۋىتتا كونسەرۆىلەنگەن ءونىم بانكىلەرگە باسىلىپ جابىلادى. وسىلايشا، «كۋبلەي» زاۋىتىنىڭ جۇزدەگەن دايىن ءونىمى ورال قالاسىنىڭ وزىندە شىعارىلادى. ايتا كەتەيىك، ءدال وسى زاۋىتتا كونسەرۆى بانكىلەرى دە دايىندالادى.

«ءوزىڭىز بىلەسىز جۇرتتىڭ كوبى قازىر يپوتەكالىق ۇيدە وتىر، جاستار ۇيلەنە سالىپ كۆارتيرادا تۇرىپ جاتىر. سەبەبى ءۇي الا قوياتىن مۇمكىندىك جوق. سوندىقتان ءبارى دە قورقىپ وتىر. قازىرگى تاڭدا جۇمىس ىستەپ جاقان 600 كىسى دەپ تۇرمىز عوي. ونىڭ ارقايسىسىنىڭ وتباسى بار. وعان قوسا شارۋا قوجالىقتارى دا بار. ءبارىن ەسەپتەگەندە مىڭنان استام ادام عوي. سول ادامنىڭ ءبارى جۇمىسسىز قالۋى مۇمكىن. اۋىلداردان كەلىپ جۇمىس ىستەپ جاتقاندار كوپ، كوبىسىنىڭ ءبىلىمى جوق. ولار قارا جۇمىسشى رەتىندى ىستەپ ءجۇر. زاۋىت جابىلىپ قالعان جاعدايدا ولار قايدا بارادى؟ قازىر بالىق، ەت جاسايتىن ماماندار كەرەك ەمەس. تەك بىزدەرگە عانا كەرەك»،- دەدى «كۋبلەي» زاۋىتىنىڭ باس تەحنولوگى گۇلجازيرا كەنجەعاليەۆا.

ەگەر سوت شەشىمى زاۋىتتىڭ پايداسىنا شەشىلمەسە بقو-داعى ءۇش مىڭعا جۋىق شارۋا قوجالىعى قول قۋسىرىپ وتىرمايتىندارىن ايتادى. ولار نارازىلىققا شىعۋعا دايىن.

ال زاۋىت جانىنان سالىنعان كوپقاباتتى ۇيدەن پاتەر العان تۇرعىندار ءالى كۇنگە دەيىن قۇجاتتارىن الا الماي ءجۇر. مۇنداي جاعداي بولارىن بىلگەنىمىزدە ەرمەنوۆتەردىڭ  قۇرىلىس كومپانياسىنا جولامايتىن ەدىك، دەيدى ولار.

«8 اي بولدى وسى جەردە تۇرىپ جاتقانىمىزعا. سۋ، جارىق، جىلۋ ءبارى بار. بىراق قۇجاتتارىمىز جوق. باسىندا 30 پايىزىن تولەدىك، سودان كەيىن جوندەۋ جۇمىسىن باستاعاندا تولىق تولەم جاساپ تاستادىق. سوت ءىستى ۋاقىتقا ءىستى توقتاتىپ تاستادى. ەندى ءبىز بىلمەيمىز قانشا كۇتەتىنىمىزدى. ارينە مۇنداي بولاتىنىن بىلگەندە، بۇل جەردەن پاتەر المايتىن ەدىك»، - دەدى قۇرىلىس كومپانياسىنا الدانىپ قالعان تۇرعىننىڭ ءبىرى  باۋىرجان دۋشاكانوۆ.

«قازىر سول قولما-قول العان كرەديتتى تولەپ ءجۇرمىز. بىراق قولىمىزدا پاتەردىڭ قۇجاتى جوق. قازىر قولدا ەشقانداي قۇجات جوق.

نەگىزى مەن ءۇيدى العاندا قۇجاتتاردى قاراعان جوقپىن. بىراق مۇندا زاڭگەرلەر دە تۇرادى. ولار قۇرىلىس كومپانياسىنا كەلىپ، قۇجاتتارىن قاراپ، سوسىن اقشالارىن سالدى»، - دەدى الينا قۇرمانوۆا.

قر اۋىل شارۋاشىلىعى مينيسترلىگى ەگەر زاۋىت جابىلاتىن بولسا، تەك قانا ءبىر وبلىس جاپا شەگىپ قانا قويماي، بۇكىل رەسپۋبليكانىڭ اۋىل شارۋاشىلىعىنا قاۋىپ تونەتىنىن ايتتى.

«كۋبلەي جشس زاۋىتى جابىلۋى ول شيكىزاتتىڭ جەتكىلىكسىزدىگىمەن، ىشكى نارىقتى ەت ونىمدەرىمەن قامتاماسىز ەتۋى تومەندەۋىمەن ەلدەگى اۋىل شارۋاشىلىعىنىڭ جۇمىسىنا كەرى اسەرىن تيگىزەدى. سونىمەن قاتار ەكسپورتقا شىعارىلاتىن تاۋارلار تومەندەپ، يمپورتتىق تاۋاردىڭ ىشكى نارىقتا كوبەيۋىنە اكەلىپ سوعادى. زاۋىتتىڭ جابىلۋىنىڭ ناتيجەسىندە 700 ادام جۇمىسسىز قالادى. سونداي-اق وتاندىق قايتا وڭدەۋ كاسىپورىندارىنىڭ باسەكەگە قابىلەتتىلىگىن ايتارلىقتاي تومەندەتەدى»،-دەيدى مينيسترلىك.

ايتا كەتەيىك، «كۋبلەي» زاۋىتى سوڭعى ءۇش جىلدا بيۋدجەتكە 5 ميلليارد 652 ميلليون تەڭگە سالىق تولەگەن.

Abai.kz