جالپى، اكىمدەردىڭ بارلىعىنا دا قارا بوياۋ جاعا بەرۋگە بولماس. ىشىندە بىرەن-ساران بولسا دا, حالىقتىڭ قامىن ويلايتىن پاراساتتىلارى دا كەزدەسىپ قالادى.

ولاردى ارينە، سالىستىرۋ ارقىلى جاقسى بىلەسىز. ماسەلەن، ءبىزدىڭ قوستانايدىڭ ءتول بالاسى – عاۋەز نۇرمۇحانبەتوۆ سولتۇستىك قازاقستان وبلىسىنا اكىم بولىپ بارعان بويدا ونى سونداعى قازاقتاردىڭ سانى 35 پايىزعا دا جەتپەيتىندىگى قاتتى الاڭداتادى ەكەن. وڭتۇستىك پەن باتىس وڭىرلەرىنەن قازاقتاردى وسىندا كوشىرۋ ماسەلەسىنە دە ەرەكشە كوڭىل ءبولىپ، قاتتى قاداعالايتىندىعىن ايتىپتى.

عاۋەز تورسانۇلىنىڭ ويىنشا، ولارعا قانداستار قوسىلسا، وسى وڭىردەگى قازاقتاردىڭ ۇلەس سالماعى باسىم بولاتىندىعىنا سەنىم بىلدىرگەن.

«اسىرەسە، مۇنداعى ءالى ءوزىنىڭ لايىقتى ورنىن تابا الماي جۇرگەن انا ءتىلىمىزدىڭ مەرەيى ءوسىپ قالار ەدى»، - دەيدى اكىم. ەندى مۇنداي اكىمگە قالاي ريزا بولماسسىڭ؟..

ال ەكىنشى ءبىر ءىرى باسشى – قوستانايدىڭ ءدال وسىنداي ءتول بالاسى، وسىندا اۋدان اكىمى قىزمەتىن ىستەپ، كەيىن «نۇر وتاندى» باسقارىپ، ونان سوڭ جامبىل وبلىسى اكىمىنىڭ ورىنباسارى بولىپ، سوسىن سولتۇستىك قازاقستان وبلىسىنا اكىمدىككە بارىپ، مىقتاپ ورنىعىپ، اقىرى تۋعان جەرىنە اكىم بولىپ قايتا ورالعان – قۇمار اقساقالوۆتىڭ اۋزىنان مۇنداي ءسوزدى ەستىگەن ەمەسپىن.

ال مۇندا دا جاعدايدىڭ وڭىپ تۇرعانى شامالى. قوستانايعا قالىڭ قازاق شوعىرلانعان قاسيەتتى تورعايدى قوسقاننىڭ وزىندە، مۇنداعى قازاقتارڭىڭ ۇلەس سالماعى 40 پايىزدان اسپايدى. الايدا بۇل ماسەلەگە عاۋەز نۇرمۇحانبەتوۆ سەكىلدى ەرەكشە كوڭىل ءبولىپ، جاناشىرلىق تانىتىپ جاتقان اقساقالوۆتى كورمەدىك.

ءسىرا، قازاقتاردى مولايتۋ مەن انا ءتىلىمىزدىڭ ماسەلەسى باياعىدا ءارى تۇپكىلىكتى شەشىلىپ قويىلعان سەكىلدى. تەك قانا فورمالدى تۇردە عانا جۇمىس ىستەيتىن، اكىمنىڭ ايتقانىنان شىعا الماي، سونى اۋزىنا قاراپ وتىرعان اتى دارداي وبلىستىق قوعامدىق كەڭەس دەگەندى دە ونشا تولعاندىرمايتىن ءتارىزدى. ولاردىڭ بۇل ماسەلەنى تالقىلاعاندىعىن دا ازىرگە ەستي قويعان جوقپىز. ەشكىمگە ايتپاي، استىرتىن تالقىلاپ جاتپاسا...

مىنەكەي، رەسپۋبليكا كولەمىندە اتى بەلگىلى بولىپ قالعان قوستانايدىڭ قوس پەرزەنتىنىڭ بۇگىنگى بەت-بەينەسى وسىنداي. ءبىرى - بارعان بويدا حالقىمىزدىڭ وسال تۇستارىن ءدال باسىپ، قوردالانعان پروبلەمالاردى شەشۋگە بەلسەنە كىرىسسە، ەكىنشىسى سولتۇستىك وبلىستارعا قانداستارىمىزدى قايتسەك كوبىرەك ورنالاستىرامىز دەپ، ءتۇن ۇيقىسىن ءتورت ءبولىپ جۇرگەن، ءوزى وڭتۇستىك وڭىردەن كوش باستاپ بارعان بۋراحان داقانوۆ دەگەن ۇلتجاندى ازاماتتى قابىلداۋعا دا از عانا ۋاقىت تاپپاعان.

ال ەكىنشىسى جۇمىسىنا كىرىسكەن بويدا بۋراحاندى الدىمەن قابىلدايتىندىعىن ايتىپ ۋادە بەردى. عاجاپ دۇنيە. وسى ەكى اكىم دە ءبىر ءوڭىردىڭ تۋماسى. ال ايىرماشىلىعى جەر مەن كوكتەي. قالعانىن وزدەرىڭىز تارازىلاي جاتارسىزدار.

جايبەرگەن بولاتوۆ

Abai.kz