ءتىلىمىزدىڭ بولاشاعى
قازاق ءتىلىنىڭ ۇلىلىعى، بايلىعى تۋرالى توم توم كىتاپتار جازىلدى. ەندى تەك ونى ءىس جۇزىندە قولدانۋ ماسەلەسى عانا قالدى.
ءتىل ۇيرەنۋ، قازاقشا سويلەۋ قاجەتتىلىكتەن تۋادى. ەڭ الدىمەن قازاقتىڭ ءوزى قۇلدىق پسيحولوگيادان تولىق ارىلىپ، تەك قازاقشا سويلەۋ كەرەك.
بۇل وڭاي شارۋا ەمەس! ءۇشىن قۇلدىق پسيحولوگيادان ارىلۋ كەرەك!
قۇلدىق پسيحولوگيا دەگەنىمىز نە؟ قۇلدىق پسيحولوگيا دەگەنىمىز دۇكەنگە كىرگەندە، كولىككە مىنگەندە، جينالىستاردا ت.ب.
«مەن قازاقشا سويلەسەم باسقالار تۇسىنبەي قالار» دەپ جالتاقتاۋ، كوڭىلىنە قاراۋ، ساتۋشىنىڭ ىڭعايىنا قاراپ ورىسشا سويلەۋ. وسىنداي پسيحولوگيادان ارىلماي قازاق ءتىلىن كوتەرە المايمىز.
مىسالى، ءدال بۇگىن دۇكەنگە بارىڭىز دا ساتۋشىنىڭ كىم ەكەنىنە قاراماي «شىراعىم، ماعان ءبىر نان، ءسۇت، قانت بەرشى. باعاسى نەشە؟» دەپ قازاقشا سويلەڭىز.
سول كەزدە ءسىز قۇلدىق پسيحولوگيادان ارىلدىم دەپ ەسەپتەڭىز.
ال ساتۋشى بولسا: «ەە، مىنا قازاقتار قازاقشا سويلەي باستاپتى عوي، قوي قۇرىسىن، مەن دە ءبىر ەكى اۋىز قازاقشا ۇيرەنەيىن» دەپ كىرىسەدى.
«يا پو كازاحسكي نە پونيمايۋ» دەپ پوزاعا تۇرىپ السا زاڭ دا، ادامگەرشىلىك تە ءسىزدىڭ جاعىڭىزدا.
جانجالدان قاشقان دۇكەن يەسى دە ەكى تىلدە بىلەتىن ساتۋشىنى الادى جۇمىسقا!
شىمكەنتتە نەگە ورىسى دا وزبەگى دە قازاقشا سويلەيدى؟ قۇلدىق پسيحولوگيادان بىزدەن بۇرىن ارىلعان ولار وسىلاي ۇيرەتتى عوي.
سوندىقتان، ءدال بۇگىننەن باستاپ وسى توپتاعىلار وزدەرىنەن باستاپ قۇلدىق سانادان ارىلىپ، دۇكەندە، قوعامدىق كولىكتە، جۇمىستا تەك قازاقشا سويلەڭىزدەر.
ەگەر سىزگە بىرەۋ ورىسشا سۇراسا: «مەن تەك قازاقشا سويلەيمىن. ءسىزدىڭ ءتىلدى تۇسىنبەي تۇرمىن. اي دونت سپيك راشن. تەلل مي ين كازاح ور ينگليش» دەڭىز اعايىن.
سوندا عانا سەڭ قوزعالادى. باسقالاردىڭ ىعىنا جىعىلىپ سولاردىڭ تىلىندە سويلەسەڭىز بۇل ءبىزدىڭ مادەنيەتسىزدىگىمىزدى، قۇل ەكەنىمىزدى كورسەتەدى.
ارينە، قازاقتى جەر قىلىپ ءوز تىلىنەن بەزدىرىپ، ورىس تىلىندە سويلەۋگە ءماجبۇر ەتكەن قۇلداردىڭ قوجايىنى بۇعان قارسى تۇرادى.
بىراق، ءسىزدىڭ ساناڭىز باياعىداي كۇيىندە قالسا، كۇرەسپەسە وندا ەشتەڭە وزگەرمەيدى. وزىمىز ماقتانىش ەتەتىن ءتىلىمىزدى ءوز قولىمىزبەن جەرلەيمىز.
جەڭىس جومارت جەڭىسۇلى،
زاپاستاعى پولكوۆنيك، تاريح عىلىمىنىڭ كانديداتى، پەداگوگيكا عىلىم اكادەمياسىنىڭ كوررەسپوندەنت مۇشەسى
Abai.kz
