27-30 مامىر كۇندەرى تالدىقورعان قالاسىنداعى «جاستار» سپورت سارايىندا مەملەكەتتىك قىزمەتشىلەر اراسىندا وبلىستىق دەڭگەيدەگى III سپارتاكيادا وتۋدە. بۇل – تەك سپورتتىق سايىس قانا ەمەس، سالاۋاتتى ءومىر سالتىن ۇستاناتىن، جىگەرى مىقتى، رۋحى بيىك ازاماتتاردىڭ باسىن قوسقان ناعىز مەرەكە.

جارىس باعدارلاماسىنا شاعىن فۋتبول، ۆولەيبول، قازاق كۇرەسى، ۇستەل تەننيسى، ءجۇزۋ، توعىزقۇمالاق، شاحمات، ارقان تارتۋ، 3ح3 باسكەتبول جانە بيليارد سەكىلدى سپورت تۇرلەرى ەنگەن. ءار قاتىسۋشى – ءوز سالاسىنىڭ مايتالمانى: اۋىل اكىمدەرىنەن باستاپ، باسقارما باسشىلارىنا، ساراپشىلار مەن ءباسپاسوز حاتشىلارىنان باستاپ وبلىس اكىمىنىڭ ورىنباسارلارىنا دەيىن. ءتىپتى قۇقىق قورعاۋ ورگاندارىنىڭ وكىلدەرى دە ءوز باقتارىن سىناۋدا.

بۇل سپارتاكيادانىڭ باستى ماقساتى – مەملەكەتتىك قىزمەتشىلەر اراسىندا سپورتتى كەڭىنەن ناسيحاتتاپ، بەلسەندى ءارى سالاۋاتتى ءومىر سالتىنىڭ ۇلگىسىن كورسەتۋ. سپورت – تەك دەنە شىنىقتىرۋ عانا ەمەس، سونداي-اق ۇيىمشىلدىق پەن جاۋاپكەرشىلىككە باۋليتىن، ۇجىمدىق رۋحتى كۇشەيتەتىن ماڭىزدى قۇرال.

اۋقىمدى شارانى جەتىسۋ وبلىسىنىڭ دەنە شىنىقتىرۋ جانە سپورت باسقارماسى مەن قر مەملەكەتتىك قىزمەت ىستەرى اگەنتتىگىنىڭ جەتىسۋ وبلىسى بويىنشا دەپارتامەنتى بىرلەسىپ ۇيىمداستىرىپ وتىر.

Abai.kz