ەلدە تۇماۋعا قارسى يممۋنداۋ ناۋقانى باستالدى. بيىل «گريپپول پليۋس» ۆاكتسيناسىنىڭ ەكى ميلليوننان استام دوزاسى ساتىپ الىندى. بۇل شامامەن حالىقتىڭ 11 پايىزىن قورعاۋعا جەتكىلىكتى. ەڭ الدىمەن ەكپە بالالارعا، قارتتارعا، جۇكتى ايەلدەرگە، مەديتسينا قىزمەتكەرلەرىنە جانە اسكەريلەرگە سالىنىپ جاتىر.

ۆاكتسينا سوزىلمالى اۋرۋى بار بالالارعا، مۇعالىمدەرگە، مەديتسينا قىزمەتكەرلەرىنە، اسكەري قىزمەتشىلەرگە، جۇكتى ايەلدەرگە جانە قارت ادامدارعا تەگىن سالىنادى.

«ۆاكتسينا رەسپۋبليكانىڭ بارلىق وڭىرىنە جەتكىزىلدى. ونى تىركەلگەن ەمحانا بويىنشا الۋعا بولادى. ەكپە جرۆي مەن تۇماۋدىڭ ەپيدەميالىق ماۋسىمى باستالار الدىندا جۇرگىزىلەدى. بۇل اعزانى قورعاپ، ۆيرۋسقا قارسى انتيدەنەلەر قالىپتاستىرۋعا كومەكتەسەدى. سونداي-اق تىنىس جولى ينفەكتسياسىنان كەيىنگى اسقىنۋلاردىڭ الدىن الادى»، - دەدى ينفەكتسيالىق اۋرۋلاردى باقىلاۋ باسقارماسىنىڭ باس ساراپشىسى سالتانات بەكقوجينا.

ونىڭ ايتۋىنشا، ناۋقان بارلىق جاس توپتارىن قامتيدى: ەكپەنى التى ايدان اسقان بالالار دا، 65 جاستان اسقان قارتتار دا الا الادى.

«قاجەت بولعان جاعدايدا ۆاكتسيناتسيانى ۇيىمداستىراتىن كوشپەلى ەگۋ بريگادالارى بار»، - دەپ قوستى بەكقوجينا.

پرەپاراتقا تەرىس اسەرلەر تىركەلگەن جوق.

دەنساۋلىق ساقتاۋ مينيسترلىگى پروفيلاكتيكا شارالارىن ەسكە سالدى:

• ادامدار كوپ جينالاتىن جەرلەردەن اۋلاق بولۋ;
• ءۇي-جايدى ءجيى جەلدەتۋ;
• قولدى جۋ جانە اۋرۋدىڭ العاشقى بەلگىلەرى بايقالعاندا ءوزىن-ءوزى ەمدەمەي، دارىگەرگە جۇگىنۋ.

قازىرگى تاڭدا ەلدە تۇماۋ جاعدايلارى تىركەلمەگەن.

Abai.kz