قازاقستاندا جىل سايىن تۇسىك جاساتاتىن ايەلدەر سانى 70 مىڭنان استى. مينيسترلىك ستاتيستيكانى ازايتۋ باعىتىنداعى جۇمىستاردى كۇشەيتپەك...

قازاقستاندا جىل سايىن شامامەن 70 مىڭنان استام ايەل تۇسىك جاساتادى. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا ۇكىمەتتەگى بريفينگتە مالىمدەدى، دەپ حابارلايدى Qaz365.kz.

ءمينيستردىڭ ايتۋىنشا، مەملەكەت بۇل ۇرەيلى ستاتيستيكانى ازايتۋ باعىتىنداعى جۇمىستاردى كۇشەيتۋى ءتيىس. اسىرەسە، زاماناۋي كونتراتسەپتسيا قۇرالدارىنا قولجەتىمدىلىكتى ارتتىرۋ ماڭىزدى.

«قازاقستاندا جىل سايىن 75 مىڭعا جۋىق تۇسىك جاسالادى. قازىرگى وتباسىن جوسپارلاۋ ادىستەرى دامىعان زاماندا بۇل كورسەتكىشتى تومەندەتۋگە ءتيىسپىز. سەبەبى ءاربىر تۇسىك – ايەلدىڭ ءومىرى مەن دەنساۋلىعىنا تونەتىن قاۋىپ»، – دەدى اقمارال ءالنازاروۆا.

مينيستر الەۋمەتتىك وسال ايەلدەرگە تەگىن كونتراتسەپتيۆتەر بەرۋ ءۇشىن ەمحانالارعا قاراجات ءبولىنىپ جاتقانىن، الايدا ونىڭ ءالى جەتكىلىكسىز ەكەنىن اتاپ ءوتتى.

«بۇگىندە ەمحانالار الەۋمەتتىك وسال توپتاعى ايەلدەردى وتباسىن جوسپارلاۋ قۇرالدارىمەن قامتاماسىز ەتۋگە قارجى ءبولىپ وتىر. بىراق بۇل جەتكىلىكسىز، سوندىقتان جۇمىس جالعاسۋدا»، – دەدى ول.

سونداي-اق ءاربىر مەديتسينالىق ۇيىم بۇل ماقساتقا ءوز بيۋدجەتى ەسەبىنەن قارجى قاراستىرادى. ال كەي وڭىرلەردە جەرگىلىكتى بيۋدجەتتەن دە قوسىمشا قاراجات بولىنەدى.

«قازىر ءبىز ءار اكيماتپەن بىرگە وسى باعىتتا جۇمىس ىستەپ جاتىرمىز. ماقسات – كونتراتسەپتسيا قۇرالدارىنا مۇقتاج ايەلدەردى كوبىرەك قامتۋ»، – دەدى مينيستر.

اقمارال ءالنازاروۆانىڭ ايتۋىنشا، قازاقستان رەپرودۋكتيۆتى دەنساۋلىق سالاسىندا حالىقارالىق تاجىريبەنى زەرتتەپ، شەتەلدىك مامانداردى تارتىپ وتىر.

«بۇل – بارلىق وركەنيەتتى ەلدەردىڭ تاڭداۋى. ءبىز دە وسى باعىتتا العا جىلجيمىز»، – دەدى ول.

Abai.kz