سپورتتا ەشكىم كۇتپەگەن كەزدەيسوق جەڭىس بولمايدى. ءار جەتىستىكتىڭ ارتىندا ۇزاق جىلعى تىنىمسىز ەڭبەك، تەمىردەي ءتارتىپ جانە ەڭ باستىسى، سول چەمپيوندىق جولدان وتكەن جاتتىقتىرۋشى تۇرادى. قازاق سپورتىندا دا بۇل زاڭدىلىق جۇمىس ىستەيدى. ۇلتتىق قۇراما سپورتشىلارىنىڭ كوپتەگەن جەڭىسىنە ءبىز بۇرىن تۇعىر ساتىسىنان كورگەن مامانداردىڭ قوسقان ۇلەسى زور.

مۇنىڭ جارقىن كورىنىسى – ەلدوس سمەتوۆ. ول – دزيۋدودان وليمپيادادا بارلىق مەدال جيىنتىعىن ولجالاعان تۇڭعىش قازاق پالۋانى. وتانداسىمىز پاريجدە – التىن، ريودا – كۇمىس، توكيودا قولا مەدال جەڭىپ الدى. ونىڭ سپورتتاعى جولى جامبىل وبلىسىندا باستالدى. العاشقى باپكەرى – احمەت جۇماعۇلوۆ. كەيىننەن سمەتوۆتى حالىقارالىق دارەجەدەگى سپورت شەبەرى جانە حالىقارالىق باسەكەلەردىڭ جۇلدەگەرى عالىمجان جىلگەلديەۆ جاتتىقتىرا باستاعان. بۇگىندە جىلگەلديەۆ ءالى دە سمەتوۆپەن جانە قۇرامانىڭ باسقا دا كوشباسشىلارىمەن جۇمىس ىستەيدى. تاجىريبەلى مامان ولارعا كۇرەس تەحنيكاسىن عانا ەمەس، بويىنا چەمپيونعا ءتان قاسيەتتى ءسىڭىرىپ كەلەدى.

ال ولگا دوۆگۋننىڭ تاريحى ءوز الدىنا بولەك اڭگىمە. ول – نىسانا كوزدەۋدەن ازيانىڭ بىرنەشە دۇركىن چەمپيونى جانە ءۇش وليمپياداعا قاتىسقان مەرگەن. قازىر جاس سپورتشىلارمەن، ونىڭ ىشىندە پاريج وليمپياداسىنىڭ قولا جۇلدەگەرى يسلام ساتپاەۆ جانە الەكساندرا لەمەن جۇمىس ىستەيدى. دوۆگۋننىڭ تاجىريبەسىنىڭ ارقاسىندا ۇلتتىق قۇراما تۇراقتى ناتيجە كورسەتىپ، حالىقارالىق جارىستارعا جۇيەلى دايىندىق جۇرگىزىپ جاتىر.

شاڭعى جارىسىنان دا مىقتاپ ورنىققان ۇرپاق ساباقتاستىعىن بايقاۋعا بولادى. بيىل اقپان ايىندا وتكەن قىسقى ازيا ويىندارىنىڭ جۇلدەگەرى كونستانتين بورتسوۆ ءدال سول حاربيندە 1996 جىلى وتكەن ازيادانىڭ 3 دۇركىن جۇلدەگەرى، اكەسى ۆلاديمير بورتسوۆتىڭ جەتەكشىلىگىمەن جاتتىعادى. سەنىم مەن تۇسىنىستىككە قۇرىلعان مۇنداي ساباقتاستىق تۇراقتى ناتيجەگە قول جەتكىزۋگە جول اشادى.

فريستايل-موگۋل – قازاقستانداعى ەڭ تابىستى قىسقى سپورت ءتۇرىنىڭ ءبىرى. ۇلتتىق قۇرامانىڭ باس باپكەرى ەلەنا كرۋگلىحينا كەزىندە وليمپيادادا سىنعا تۇسكەن. ونىڭ تاجىريبەسى مەن وسى سپورتتاعى تەرەڭ ءبىلىمى كومانداعا حالىقارالىق ارەنادا تۇراقتى ناتيجە كورسەتۋگە مۇمكىندىك بەرەدى. ونىڭ جەتەكشىلىگىمەن يۋليا گالىشەۆا 2018 جىلى وليمپيادانىڭ قولا جۇلدەگەرى اتانسا، اناستاسيا گورودكو جاسوسپىرىمدەر اراسىندا بىرنەشە رەت الەم چەمپيونى اتاندى.

«چەمپيونداردى چەمپيوندار تاربيەلەيدى» دەگەن ءسوزدىڭ جانى بار. قازاقستاندا بۇل جاي عانا ادەمى ءسوز تىركەسى ەمەس. ەلىمىزدىڭ تۋىن الەمدەگى ءىرى جارىستاردا بيىكتە جەلبىرەتۋگە مۇمكىندىك بەرەتىن ءتيىمدى جۇيە.

Abai.kz