JIBEK JOLY راديوسىنىڭ «ۆ كونتەكستە» توك-شوۋىندا ەنەرگەتيكا مينيسترلىگى مەملەكەتتىك ەنەرگەتيكالىق باقىلاۋ جانە قاداعالاۋ كوميتەتىنىڭ ەلەكتر جانە جىلۋ ەنەرگياسىن ءوندىرۋ ستانسالارىن قاداعالاۋ دەپارتامەنتىنىڭ باسشىسى اسحات جاقىپوۆ جىلۋ بەرۋ ماۋسىمىنا دايىندىق تۋرالى بايانداپ بەردى.

بايانداماشى وتكەن جىلىتۋ ماۋسىمىنان بەرى توعىز جەو-نىڭ قىزىل ايماقتان سارى ايماققا وتكىزىلگەنىن اتاپ ءوتتى. تاعى 10-ى تاۋەكەل ايماعىندا قالىپ وتىر. بۇل رەتتە جەو-لارداعى جابدىقتاردىڭ توزۋى 61%-عا دەيىن تومەندەتىلدى.

— بىزدە جالپى 37 جەو بار. ءبىز ولاردى كريتەريلەر بويىنشا بولدىك. ونىڭ 19-ى قىزىل ايماقتا، 11-ءى سارى ايماقتا، جەتەۋى جاسىل ايماقتا بولدى. قىزىل، بىلايشا ايتقاندا پروبلەمالىق ايماقتاعى وسى 19 جەو-عا باسا نازار اۋدارىلدى. …ماسەلەن، توزۋ دەڭگەيى، ياعني ءبىزدىڭ جابدىقتار، وزدەرىڭىز بىلەتىندەي، وتكەن عاسىردىڭ 1960 جىلدارى شىعارىلعان. تيىسىنشە، ولار جىل سايىن توزىپ كەلەدى. بىراق جوندەۋ كومپانياسىنىڭ ارقاسىندا ءبىز جالپى توزۋدى 61 پايىزعا دەيىن تومەندەتتىك. ول 64 پايىز بولعان. وسى 19 جەو-نىڭ توعىزىن وتكەن جىلىتۋ ماۋسىمىنىڭ سوڭىنا قاراي سارى ايماققا اۋىستىردىق، — دەپ باياندادى اسحات جاقىپوۆ.

ونىڭ ايتۋىنشا، سەمەي، تەمىرتاۋ، پەتروپاۆل، اقتاۋ، پاۆلودار، ستەپنوگورسك، ورال، قىزىلوردا، ارقالىق، تاراز سياقتى قالالارداعى ەلەكتر نىساندارى قىزىل ايماقتا قالىپ وتىر.

ەنەرگەتيكا مينيسترلىگى وكىلىنىڭ بايانداۋىنشا، قازىر بۇل ۋچاسكەلەردە جوسپارلى جۇمىس جۇرگىزىلىپ جاتىر جانە ولار كەلەسى جىلدىڭ باسىندا سارى ايماققا اۋىستىرىلۋى مۇمكىن.

بايانداماشى وڭىرلەردىڭ كومىرمەن قامتاماسىز ەتىلۋىنە قاتىستى ساۋالعا دا جاۋاپ بەردى.

— شارۋاشىلىقتار مەن كوممۋنالدىق قىزمەتتەرگە قاجەتتى جىل سايىنعى 7,4 ملن توننا كومىردىڭ شامامەن 4,5 ملن تونناسى ساقتالىپ وتىر. بۇل جالپى نورمانىڭ 62 پايىزى. جەكە شارۋاشىلىقتارعا جەتكىزۋدە ەشقانداي ءۇزىلىس بولمايدى، — دەدى اسحات جاقىپوۆ.

ايتا كەتەلىك استانا اكىمدىگى جەو-لاردى انتيدرونمەن جابدىقتاۋعا بيۋدجەتتەن اقشا بولمەيتىن بولدى.

Abai.kz