رەسەيدىڭ سانكت-پەتەربۋرگ قالاسىنداعى لەنين اۋداندىق سوتى رەسەي ارمياسىن "قارالاۋ" تۋرالى اكىمشىلىك ءىس بويىنشا جاۋاپقا تارتىلعان قازاقستان ازاماتى، 52 جاستاعى نۇرلان اقىنجانوۆقا 30 مىڭ رۋبل ايىپپۇل سالدى. بۇل تۋرالى پەتەربۋرگ قالالىق سوتى ءباسپاسوز قىزمەتى حابارلادى. اقىنجانوۆتىڭ ءوزى سوت وتىرىسىنا قاتىسپاعان.

اقىنجانوۆ 30 قاراشا كۇنى كەشكە "شوك" راديوسىنىڭ كەڭسەسىنە باسا-كوكتەپ كىرىپ كەتكەننەن كەيىن ونىڭ ۇستىنەن اكىمشىلىك حاتتاما تولتىرىلعان. ول كىرىپ كەلگەن ساتتە ستۋديادا "ۆەچە" باسپاسىنىڭ رەداكتورى گلەب ستافەەۆ سۇحبات بەرىپ جاتقان. بۇل باسپا رەسەيدىڭ ۋكرايناداعى سوعىسىنا قولداۋ بىلدىرگەن ونىمدەر شىعارعانىمەن بەلگىلى.

ستافەەۆتىڭ سوزىنشە، اقىنجانوۆ "ۆلاديمير ءپۋتيننىڭ ساياساتىنا قارسىلىق" ءبىلدىرىپ، "ۋكراينا – باۋىرلاس ەل" ەكەنىن جانە پۋتين "ول ەلمەن كەلىسىمگە كەلە الاتىنىن" ايتقان.

رەسەيگە 2025 جىلدىڭ تامىز ايىنىڭ اياعىندا تۋريست رەتىندە ۇشىپ بارعان اقىنجانوۆ پەتەربۋرگتە تۇرعان. 15 قازاندا ول "پيتەر FM" راديوستانتسياسى كەڭسەسىنە "كۋرەرمىن" دەپ كىرىپ كەتىپ، وندا دا سوعىسقا قارسى ۇراندار ايتقاننان كەيىن ۇستالعان. رەسەيلىك باق ونىڭ ۇستىنەن "ۇساق بۇزاقىلىق" بابىمەن اكىمشىلىك حاتتاما تولتىرىلعانىن جازدى.

دەرەككوزى: ازاتتىق راديوسى

Abai.kz