باسى: ويدان تويعا دەيىن

جالعاسى: تۇڭعىشتىڭ قىزىعى مەن قيىندىعى

جالعاسى: ساياساتتىڭ سالقىنى: ءىى چەمپيونات. 1934 جىل. يتاليا

جالعاسى: پوتستسونىڭ قايتالانباس قولتاڭباسى

جالعاسى: تۇتاس ۇلتتى قايعىرتقان گول

جالعاسى: ءالپى ەتەگىندەگى اۋلا فۋتبولى

جالعاسى: ۇلى جاڭالىقتار ۋاقىتى

جالعاسى: گاررينچانىڭ چەمپيوناتى

جالعاسى: ۇرلانىپ-تابىلعان كۋبوك

جالعاسى: 1970 جىل. قوش، «التىن نيكە»!

جالعاسى: 1974 جىل. «تۇتاسقان فۋتبولدىڭ» تۇعىرى

جالعاسى: دەر كەزiندە قۇرتىلعان مۇرت

جالعاسى: 1982 جىل. كاتتەناچچو جانە قارسى شابۋىل

جالعاسى: مايتالمان مارادونا جانە... «قۇدايدىڭ قولى»

جالعاسى: پەنالتي تەبۋدەن جارىس

جالعاسى: 1994 جىل. 24 جىل كۇتكەن جەڭىس

جالعاسى: 1998 جىل. جاڭا فورمات – جاڭا چەمپيون 

جالعاسى: 2002 جىل. فۋتبولدىڭ جەڭىسى

جالعاسى: 2006 جىل. ساق ويىننىڭ سالتاناتى

جالعاسى: 2010 جىل. تيكي-تاكا تريۋمفى

Xح چەمپيونات. 2014 جىل. برازيليا

الەم چەمپيونى – گەرمانيا
كۇمىس جۇلدەگەر – ارگەنتينا
قولا جۇلدەگەر – گوللانديا

چەمپيون توپتا-اق توڭقالاڭ استى

فۋتبول ونەرىنىڭ دامۋىنا، شەجىرەسىنىڭ باي تۇسۋىنە مول ۇلەس قوسقان برازيليا ەلى اراعا 64 جىل سالىپ، الەمدىك دوپ دوداسىن قايتا قابىلدادى. بەس رەت الەم چەمپيونى اتانعان برازيليا قۇراماسى سونىڭ بىردە-ءبىرىن ءوز جەرىندە يەلەنگەن ەمەس-ءتى. 1950 جىلى ءوز ەلىندە وتكەن دودانىڭ فينالىندا ولاردىڭ ويلاماعان جەردەن ۋرۋگۆايدان ۇتىلىپ قالعانى بەلگىلى. تورسيدا اراسىندا «ماراكانازو» («ماراكاناداعى» ماسقارا» دەگەن ماعىنادا) اتانىپ كەتكەن سول سۇمدىقتى ەل جادىنان ءوشىرىپ، التىنشى التىندى سول فۋتبول مەككەسىندەي ايگىلى ستاديوندا جەڭىپ الماققا بەكىنگەن برازيليا قۇراماسىن بۇل جولى سكولاري باسقاردى (2002 جىلعى جەڭىمپاز كوماندانىڭ ۇستازى).

الايدا بۇل جولى ونىڭ جەتەكشىلىگىندەگى جىگىتتەردىڭ ويىنى ونشا كوز جاۋىن الا قويعان جوق. بەتاشار ماتچ ءتىپتى ءبىرشاما داۋ-داماي تۋىنداتتى. قاربالاس ءساتتىڭ بىرىندە حورۆات قورعاۋشىسى لوۆرەنمەن دوپقا تالاسقان شابۋىلشى فرەد ايىپ الاڭىندا قۇلاپ قالدى. جاپون تورەشىسى نيسيمۋرا بىردەن 11 مەترلىك نۇكتەنى نۇسقادى! ونى جان-جاقتان قورشاپ العان حورۆاتتار ويىن ءتارتىبىنىڭ مۇلدە بۇزىلماعانىن دالەلدەۋگە تىرىستى. تەلەقايتالاۋدا راسىندا دا فرەدتىڭ ەشكىمنىڭ «كومەگىنسىز» ءوزى جىعىلعانى اڭعارىلدى. الايدا تورەشى شەشىمىن وزگەرتكەن جوق، نەيمار پەنالتيدەن ەكىنشى دوبىن سوقتى. بۇعان دا مويىماعان حورۆاتيا قۇراماسى الاڭ قوجايىندارىن كادىمگىدەي تىقسىردى. بىراق ەش ناتيجە شىعارا المادى.

وسى «ا» توبىنداعى مەكسيكا – كامەرۋن ماتچىندا دجوۆانني دوس سانتوس سوققان ەكى گولدى دا كولۋمبيالىق تورەشى ەسەپتەمەي قويدى! سەبەپ – قاپتالداعى قازىنىڭ جالاۋشا كوتەرۋى. شىن مانىندە ەكەۋىندە دە ەشقانداي وفسايد بولعان جوق-تى. قۇداي وڭداپ، پەرالتانىڭ گولى مەكسيكالىقتارعا جەڭىس اپەردى، ايتپەگەندە ناعىز جانجال سوندا تۋىندار ەدى. سوسىن ءوزارا تەڭ ويناعان برازيليا مەن مەكسيكانىڭ قايسىسى قاي ورىنعا قونجيارى اقىرى وسى دوپ ايىرماسى ارقىلى شەشىلدى. مەكسيكالىق قورعاۋشى رافاەل ماركەس – ءتورت چەمپيوناتتا كاپيتان مىندەتىن اتقارعان تاريحتاعى تۇڭعىش فۋتبولشى.

«ۆ» توبىنىڭ العاشقى كەزدەسۋىندە-اق تاريحتا تۇڭعىش رەت الدىڭعى چەمپيوناتتىڭ قوس ۇزدىگى – يسپانيا مەن گوللانديا ءوزارا توقايلاستى. ءبىرىنشى تايمدا الەم جانە ەۋروپا چەمپيوندارى ەداۋىر باسىمدىق بايقاتتى. راس، ولاردىڭ قيمىلىنان بۇرىنعى كەزدەگىدەي قۋناقتىق، جاستىق جىگەر بايقالا قويعان جوق، ويتكەنى كوماندا ءبىرشاما «قارتاڭ» تارتقان-دى (ورتاشا جاسى 28-دە). 27-مينۋتتا حابي الونسو پەنالتيدەن ءوز كومانداسىن العا شىعاردى. 42-مينۋتتا داۆيد سيلۆانىڭ تورعا ءجاي اسىرا سالماق بولعان دوبىن قاقپاشى سيللەسسەن ساۋساعىنىڭ ۇشىمەن سىرتقا قاعىپ ۇلگەردى. بىرەر مينۋتتان سوڭ بليند ايىپ الاڭىنا اۋەلەتە دوپ اسىردى – ۆان پەرسي قالىقتاي ۇشىپ بارىپ، باسپەن كەرەمەت سوقتى. ءسال العا ۇمتىلىڭقىراپ كەتكەن كاسيلياس وزىنەن اسىپ ءوتىپ تورعا تۇسكەن عالامات گولعا تەك قاراپ قانا تۇردى. ۇزىلىستەن سوڭ جۇيرىك روببەن قوپال يسپان قورعاۋشىلارىنىڭ جانىنان جەلدەي ەسىپ وتە شىعىپ، قوس دوپ سوقتى، تاعى ءبىر رەت ۆان پەرسيدىڭ قانجىعاسى مايلاندى.

گوللانديا قۇراماسىنىڭ باس باپكەرى لۋي ۆان گال يسپان تيكي-تاكاسىنا قارسى 3-5-2 سحەماسىن قولدانعان ەدى. بۇل ءتاسىل چيليلىك حورحە سامپاوليگە دە ۇناسا كەرەك، اۆستراليانى 4-4-2 جۇيەسىمەن-اق جەڭگەن ول يسپانياعا قارسى دەرەۋ «گوللاند ۇلگىسىن» قولدانا قويدى. 90 مينۋت بويى ءبىر تىنباعان چيلي فۋتبولشىلارى قاي تۇستا دا قارسىلاستىڭ جولىن بوگەۋمەن بولدى. سامپاولي شاكىرتتەرى ساۋاتتى قورعانىپ قانا قويماي، جىلدام العا ۇمتىلىپ تا وتىردى. سونداي ساتتەردە ۆارگاس پەن ارانگيس ءبىر-بىردەن گول سوقتى... يسپانيا-2014 – توپتىق كەزەڭدە-اق توڭقالاڭ اسقان فرانتسيا-2002 جانە يتاليا-2010 سەكىلدى كۇيرەگەن چەمپيونداردىڭ قاتارىن تولىقتىردى.

الاڭدا – شايقاس، ال سۋارەس ءۇشىن – شايناس!

ارگەنتينالىق مامان حوسە پەكەرماننىڭ جەتەكشىلىگىندەگى كولۋمبيا قۇراماسى تۋرنيرگە باستى جۇلدىزى – فالكاوسىز كەلسە دە (سۇرمەرگەن اياعىن سىندىرىپ العان-دى), وتكىر شابۋىلىمەن، ادەمى ويىنىمەن جانكۇيەر قاۋىمدى ريزا ەتتى. الاڭ ورتاسىندا 23 جاستاعى تالانت حامەس رودريگەس قالاۋىنشا ويناق سالدى. «س» توبىنداعى ءۇش قارسىلاسىنان دا باسىم تۇسكەن ولار توپ جەڭىمپازى اتاندى. جاپونيامەن كەزدەسۋدىڭ 85-مينۋتىندا قاقپاشى وسپينانىڭ ورنىنا تۋعانىنا سول كۇنى 43 جاس، 3 كۇن بولعان ارداگەر فاريد موندراگون شىقتى. ءسويتىپ، الەم چەمپيوناتتارىنىڭ جاڭا رەكوردىن جاسادى. بۇعان دەيىن فينالدىق سىنعا قاتىسقان ەڭ قارت فۋتبولشى – كامەرۋندىق ميللا ەدى: 1994 جىلى رەسەيدىڭ قاقپاسىنا گول سالعاندا ول 42 جاستا بولاتىن... ەكىنشى ورىندى گرەكيا فۋتبولشىلارى الدى.

«D» توبىن ماماندار دا، جانكۇيەر قاۋىم دا ءاۋ باستان «ءولىم توبى» دەپ اتاعان-دى. ويتكەنى مۇندا ءۇش بىردەي الەم چەمپيونىنىڭ (ۋرۋگۆاي، انگليا، يتاليا) باسى قوسىلعان بولاتىن. جۇرتشىلىق وسى ۇشەۋىنىڭ قايسىسى ەلىنە ەرتە قايتادى، قايسى ەكەۋىنىڭ باعى اشىلىپ، جارىستى ءارى قاراي جالعاستىرادى دەپ سان ءتۇرلى بولجام جاساپ ءجۇردى. ەشكىم دە ءۇش الىپتىڭ ورتاسىنا توپ ەتە تۇسكەن كوستا-ريكانى ەلەپ-ەسكەرگەن جوق. الايدا سەنساتسيانىڭ كوكەسىن سول جاسادى. ۋرۋگۆايدى 3:1, يتاليانى 1:0 ەسەبىمەن ۇتقان ولار (جانە ەشقايسىسىن دا كەزدەيسوق جەڭدى دەي المايسىز) سوڭعى تۋردا انگلياعا دا ەسە جىبەرمەي (0:0), توپ جەڭىمپازى اتاندى. قىزىق بولعاندا، بۇل – كوش سوڭىندا قالعان اعىلشىنداردىڭ وسى تۋرنيردەگى جالعىز ۇپايى ەدى.

يتاليا – ۋرۋگۆاي ماتچى ەندى ناعىز ەكىنشى ورىن ءۇشىن تالاسقا اينالدى. شىنىنا كەلگەندە، بۇل تالاس ەمەس، كادىمگى ولىسپەي-بەرىسپەس شايقاس ەدى. ال وتكەن ويىندا اعىلشىنداردىڭ قاقپاسىنا بىرىنەن ءبىرى عاجاپ قوس دوپ توعىتىپ، ءوز كومانداسىنا جەڭىس اپەرگەن ۋرۋگۆايلىق لۋيس سۋارەس ءۇشىن... شايناس بولدى دەسەك، ارتىق ەمەس شىعار. بۇرىن دا ءبىر-ەكى رەت قارسى تاراپ ويىنشىسىنىڭ قولىن نەمەسە يىعىن تىستەيمىن دەپ، باسى بالەگەن قالعان ول ءوزىنىڭ ازۋلى شابۋىلشى ەكەنىن تۋرا ماعىناسىندا تاعى دا دالەلدەپ، بۇل جولى يتاليالىق دجوردجو كەللينيدىڭ يىعىنان تىستەپ الدى! مۇنى تورەشى بايقامادى دا، ەشقانداي شارا قولدانعان جوق. بىراق فيفا بەينەماتەريالدى پايدالانا وتىرىپ، كەيىن ونى 9 ويىنعا جازالادى. ماتچ تاعدىرىن شەشكەن گولدى قورعاۋشى ديەگو گودين باسپەن سوقتى.

«ە» توبىنان فرانتسيا مەن شۆەيتساريا سۋىرىلىپ شىقتى. ەكۆادور قۇراماسى بۇلارعا لايىقتى قارسىلاس بولا ءبىلدى، جاپ-جاقسى ويىن كورسەتتى، بىراق ءبارىبىر ءۇشىنشى ورىندا قالىپ قويدى. گوندۋراس فۋتبولشىلارى بولسا، ءۇش ويىندا دا جەڭىلدى، وزدەرى نەبارى ءبىر-اق گول سوقتى. ولاردىڭ فرانتسۋزدارمەن كەزدەسۋىندە الەمدىك دودا تاريحىندا تۇڭعىش رەت دوپقا ەندىرىلگەن «گولدى انىقتاۋ تەحنولوگياسى» كومەككە كەلدى. 48-مينۋتتا كارىم بەنزەما تەپكەن دوپ باعاناعا ءتيىپ، نوەل ۆاليادارەسكە كەلىپ ەدى، گوندۋراستىق قاقپاشى ونى ەبەدەيسىز قيمىلىمەن ءوز قاقپاسىنىڭ سىزىعىنان وتكىزىپ الدى. گوندۋراستىقتار باستاپقىدا نارازىلىق تانىتقانىمەن، زاماناۋي تەحنولوگياعا قارسى داۋ ايتا المادى. ال توپ جەڭىمپازدارىنىڭ ءوزارا باسەكەسىندە دوپ قاقپاعا قارشا بورادى – 5:2!

شابىتتى مەسسي، شارشاۋلى رونالدۋ

«ع» توبىندا ەل نازارى بىردەن ارگەنتيناعا، اسىرەسە ونىڭ كاپيتانى ليونەل مەسسيگە اۋدى. «بارسەلونا» ساپىندا تالاي جەتىستىككە جەتكەن ايگىلى جۇلدىزدىڭ ۇلتتىق قۇرامادا سولعىنداۋ وينايتىنى اڭگىمەگە ءجيى ارقاۋ بولاتىن. «التىن دوپتىڭ» ءتورت دۇركىن يەگەرى بۇل جولى سونداي ءسوزدىڭ ءبارىن جوققا شىعارعىسى كەلگەندەي ەرەكشە شابىتپەن وينادى. مۇنداي ءدۇبىرلى دوداعا تۇڭعىش قاتىسقان بوسنيانىڭ قاقپاسىنا شەشۋشى گولدى سوقتى، سونىمەن بىرگە قارسى جاق قورعاۋشىسى سەاد كولاشيناتستى ءوز قاقپاسىنا دوپ ەنگىزىپ الۋعا ماجبۇرلەدى. 0:0 بوپ بىتكەلى تۇرعان ويىننىڭ ەڭ سوڭعى ساتىندە يراننىڭ تاسقامال قورعانىنان دا ءبىر ساڭىلاۋ تاپتى. اشىق فۋتبول ويناۋعا باتىلى بارعان نيگەريالىقتاردىڭ قاقپاسىن ەكى رەت ءدال نىساناعا الدى. ءسويتىپ، العاشقى كەزەڭنىڭ وزىندە-اق ءتورت دوپ سوعىپ، مەرگەندەر كوشىن باستاعان مەسسيدىڭ شابىتتى قيمىلىنا ارقا سۇيەگەن ارگەنتينا توپ جەڭىمپازى اتاندى. ەكىنشى ورىنعا بوسنيالىقتاردى جەڭگەن نيگەريا قۇراماسى يە بولدى. ءادىلىن ايتۋ كەرەك، بۇل ماتچتا تورەشى ورەسكەل قاتەلىك جىبەرىپ، ەدين دجەكونىڭ تازا گولىن ەسەپتەمەي قويدى.

«G» توبىندا گەرمانيا قۇراماسى قارقىندى ويىن كورسەتىپ، ۇزاققا شابا الاتىنىن بايقاتتى. الدىڭعى دودا مەرگەندەرىنىڭ ءبىرى توماس ميۋللەر پورتۋگاليامەن كەزدەسۋدە حەت-تريك جاسادى. باس باپكەر يواحيم لەۆ الاڭعا بىردە-ءبىر شابۋىلشى شىعارماسا دا، العى شەپتىڭ العىر قيمىلى پورتۋگال قورعاۋشىلارىن ابدەن ءابىرجىتتى. ويىننىڭ كەي ساتتەرىندە نەمىستەر بۇرىنعى يسپان كومانداسىنىڭ تاكتيكالىق ءستيلىن شەبەر قولداندى. دوپتى ءبىر-بىرىنە توقتاۋسىز ءدال بەرە بىلەتىن ولار قارسىلاسىن قۇر جۇگىرتىپ-اق شارشاتتى. كريشتيانۋ رونالدۋ جاراقاتىنان تولىق ايىقپاسا كەرەك، بۇل ماتچتا عانا ەمەس، جالپى چەمپيوناتتا ءوز دەڭگەيىندە ونەر كورسەتە المادى.

ەكىنشى تۋرداعى گەرمانيا – گانا كەزدەسۋى الەم چەمپيوناتتارى تاريحىنداعى 800-ماتچ بولدى. وسى ويىندا شابۋىلشى ميروسلاۆ كلوزە ەسەپتى تەڭەستىرىپ، ءوزىنىڭ فينالدىق تۋرنيرلەر تاريحىنداعى 15-گولىن سوقتى. ءسويتىپ، برازيليالىق رونالدونى قۋىپ جەتتى ء(بىر قىزىعى، ەكەۋى دە 15-گولدارىن گانانىڭ قاقپاسىنا سوققان). سونىمەن قاتار كلوزە ءتورت بىردەي دوپ دوداسىندا مەرگەندىك تانىتقان ءوزىنىڭ داڭقتى وتانداسى ۋۆە زەەلەردىڭ جانە ايگىلى برازيليالىق پەلەنىڭ رەكوردىن قايتالادى. ال اقش – پورتۋگاليا ماتچىندا مۋنديال تاريحىنداعى 2300-گول سوعىلدى. ونىڭ اۆتورى – امەريكالىق دجەرمەين دجونس. كەلەسى كەزەڭگە بۇل توپتان گەرمانيامەن بىرگە نەمىس مامانى كلينسماننىڭ جەتەكشىلىگىندەگى اقش قۇراماسى ءوتتى.

«ن» تورتتىگى قۇرامى جونىنەن السىزدەۋ توپتاردىڭ ءبىرى ەدى. مۇنى ابدەن ءىش پىستىرار رەسەي – وڭتۇستىك كورەيا ويىنى دالەلدەي ءتۇسىپ، تەلەديدار الدىنداعى جۇرتتىڭ ۇيقىسىن كەلتىردى. قاقپاشى اكينفەەۆ كەشىرىلمەس قاتەلىك جىبەرىپ، وزىنە ءدوپ كەلگەن دوپتى ۇستاي الماي، وتكىزىپ الدى. ابىروي بولعاندا، ارداگەر شابۋىلشى كەرجاكوۆ قاقپا الدىنداعى قاربالاس ساتتەردىڭ بىرىندە ەپتىلىك تانىتىپ، ەسەپتى تەڭەستىرىپ كەتتى. الايدا فابيو كاپەللو باپتاعان رەسەيلىكتەر بەلگيادان ۇتىلىپ، الجيرمەن تەڭ ءتۇسىپ، نەبارى ەكى-اق ۇپايمەن ءۇشىنشى ورىندا قالدى. 1/8 فينالعا 9 ۇپاي جيناعان «قىزىل سايتاندار» مەن كورەيلەردى 4:2 ەسەبىمەن جەڭىپ، فينالدىق تۋرنيرلەردە ءبىر ويىندا 4 گول سوققان العاشقى افريكالىق قۇراما اتانعان الجير شىقتى.

چيلي مەن مەكسيكاعا وبال بولدى

پلەي-وفف كەزەڭى تاماشا ويىندارمەن باستالدى. برازيليا قۇراماسى چيليلىكتەردىڭ ولىسپەي-بەرىسپەس وجەت قارسىلىعىنا تاپ بولدى. بەس دۇركىن الەم چەمپيوندارى كەي ساتتەردە بولماسا، قارسىلاسىنان ەش ارتىق ويىن كورسەتە المادى. قايتا چيليلىكتەر كوبىرەك قاۋىپتى شابۋىلدار جاساپ وتىردى. ءتىپتى 120-مينۋتتا شابۋىلشى پينيليانىڭ سوققىسى قاقپا ماڭدايشاسىنا ءتيىپ، كەرى قايتتى! اقىرى باسەكە تاعدىرىن پەنالتي شەشتى. ەكى سوققىنى قايتارا العان برازيليالىق قاقپاشى جۋليو سەزار ايرىقشا قايرات كورسەتتى.

توپتا جاقسى ويناعان مەكسيكا قۇراماسى گوللاند قورعانىسىن ابدەن ءابىرجىتتى. اۋەلگى 45 مينۋتتا ەسەپ اشا الماعان ولار ۇزىلىستەن سوڭ اقىرى ماقساتتارىنا جەتتى: دوس سانتوس الىستان ۇرعان ادەمى سوققىسىمەن ءوز كومانداسىن العا شىعاردى. بىراق بۇدان سوڭ ولار وسى ناتيجەنى ساقتاپ قالۋعا تىرىسىپ، تەك قانا قورعانۋعا كوشتى دە، قول-اياعى بوساپ، ەركىندىك العان گوللانديالىقتار قارقىندى ۇدەتتى. چەمپيوناتتاعى ۇزدىك قاقپاشىلاردىڭ ءبىرى گيلەرمو وچوا قوس باعانا اراسىندا ارىستانشا ارپالىستى-اق. بىراق قورعاۋشىلار سىر بەردى. ويىن سوڭىندا سنەيدەر تارازى باسىن تەڭەستىردى، ال تورەشى بەلگىلەگەن قوسىمشا مينۋتتاردىڭ بىرىندە كاپيتان ماركەس ءوز ايىپ الاڭىندا روببەندى شالىپ قۇلاتىپ، تورەشى 11 مەترلىك بەلگىلەدى. راس، پورتۋگالدىق قازى پروەنسانىڭ بۇل شەشىمى ءبىرشاما داۋ دا تۋدىردى، بىراق ودان وزگەرگەن ەشتەڭە جوق: حۋنتەلار پەنالتيدى مۇلتىكسىز ورىندادى.

سۋارەستەي سۇرمەرگەنىنەن ويدا جوقتا ايرىلعان ۋرۋگۆايلىقتار كولۋمبيانىڭ تەگەۋرىنىنە توتەپ بەرە المادى. فرانتسۋزدار نيگەريانى اسا قينالماي ۇتتى، ال باسقا كەزدەسۋلەر 120 مينۋتقا سوزىلدى. ونسىز دا «قىراعى قاقپاشىلار چەمپيوناتى» دەگەن ايدار تاعىلعان ءتۋرنيردىڭ اجارىن الجيرلىك رايس مبولي مەن امەريكالىق تيم حوۋارد ودان سايىن اشا ءتۇستى. العاشقىسى نەمىستەردىڭ الاقۇيىن شابۋىلىنا تالاي ۋاقىت توتەپ بەرىپ، ويىننىڭ سوڭعى ساتكە دەيىن قىزىقتى وتۋىنە ۇلەس قوسسا، كەيىنگىسى بەلسەندى بەلگيالىقتارمەن جالعىز ارپالىستى. قوس ماتچتىڭ دا قوسىمشا ۋاقىتقا ۇلاسۋى قاقپاشىلار ەرلىگىنە بايلانىستى ەدى. دەگەنمەن شيرەك فينالعا ءوز مىقتىلىعىن دالەلدەگەن گەرمانيا جانە بەلگيا شىقتى. ولاردىڭ قاتارىنا جەڭىس گولىن 118-مينۋتتا ارەڭ سوققان ارگەنتينا دا قوسىلدى. بۇل جولى مەسسي ەمەس، انحەل دي ماريا ەرەكشە كوزگە ءتۇستى.

توپتىق كەزەڭدەگى ءىرى سەنساتسيانىڭ اۆتورى – كوستا-ريكا جەڭىستى جولىن ءارى قاراي جالعاستىردى. بۇل جولى ولار وزدەرى سەكىلدى ولەرمەن گرەكتەرمەن 120 مينۋت بويى تىرەستى. ازشىلىقتا قالىپ، ابدەن سىلەسى قاتقان كوستا-ريكا فۋتبولشىلارى تاماشا قاقپاشى كەيلور ناۆاستىڭ شەبەرلىگىنىڭ ارقاسىندا شيرەك فينالعا شىقتى. ءوز تاريحىندا تۇڭعىش رەت!

«مينەيراوداعى» ماسقارا

بىراق شيرەك فينالدا ناۆاستىڭ تالانتى دا كومەكتەسە المادى. بۇل ويىن دا 120 مينۋتقا سوزىلدى. راس، كوستاريكالىقتارعا تالاي رەت قۇداي دا قاراستى: دوپ ماڭدايشاعا دا ءتيدى، بىرنەشە ۇرىمتال ءساتتى گوللاندىقتار دۇرىستاپ پايدالانا العان جوق. اقىرى ءبارى تاعى دا جۇيكە سىناعى – پەنالتيگە كەپ تىرەلدى. مىنە، وسى ساتتە ۆان گالدىڭ باسى ىستەپ-اق كەتتى. ايتپاقشى، «وسى ساتتە» ەمەس، بۇل جوسپاردى ول الدىن الا ويلاستىرىپ قويعان ەكەن. 120-مينۋتتا ول سيللەسسەننىڭ ورنىنا ەڭگەزەردەي قوسالقى قاقپاشى تيم كرۋلدى شىعاردى. كوستا-ريكا فۋتبولشىلارىنىڭ ەكى سوققىسىن ۇستاعان ول پەنالتي سەرياسىنىڭ قاھارمانىنا اينالدى. وسى ويىنداعى تاعى ءبىر قاھارمان – وزبەك تورەشىسى راۆشان يرماتوۆ ەدى. ول فينالدىق تۋرنيرلەردە ءوزىنىڭ 9-ماتچىنا قازىلىق ەتىپ، الەمىك رەكورد جاسادى.

«برازيليا – كولۋمبيا ماتچى لاتىنامەريكالىق تەحنيكا سالتانات قۇرار ءساندى ويىن بولادى» دەسكەن جۇرتشىلىقتىڭ كۇتكەنى ورىندالمادى. كەرىسىنشە، كەزدەسۋ وتە دورەكى ءوتتى. اسىرەسە الاڭ قوجايىندارى قارسىلاسىنىڭ ءار شابۋىلىن «ۇساق فول تاكتيكاسى» دەپ اتالاتىن جاعىمسىز ادىسپەن ءۇزىپ تاستاي بەردى. ولاردان كولۋمبيالىقتار دا قالىسقان جوق. يسپان تورەشىسى كاربالو شەكتەن شىعىپ بارا جاتقانداردىڭ جازاسىن بىردەن بەرمەي، جالپاقشەشەيلىك تانىتتى. مۇنىڭ اقىرى نەيماردىڭ اۋىر جاراقاتىنا اپارىپ سوقتى. ونىڭ ارقاسىنان سۋنيگا تىزەسىمەن تەپكەن، شابۋىلشىنىڭ ومىرتقاسى سىنعان. كولۋمبيالىق قورعاۋشى بۇل دورەكىلىگى ءۇشىن ءتىپتى ەسكەرتۋ دە العان جوق! ال ويىن تاعدىرىن برازيليانىڭ ورتالىق قورعاۋشىلارى (تياگو سيلۆا مەن داۆيد لۋيز) شەشتى. گەرمانيا مەن ارگەنتينا قارسىلاستارىن (تيىسىنشە فرانتسيا مەن بەلگيانى) بىردەي ناتيجەمەن جەڭدى.

جارتىلاي فينالدىڭ بىرىندە گەرمانيا الاڭ قوجايىندارىن 7:1 ەسەبىمەن ماسقاراعا ۇشىراتتى. بۇل – برازيليا قۇراماسىنىڭ دۇنيەجۇزىلىك چەمپيوناتتارداعى ەڭ ءىرى جەڭىلىسى ەدى. جانە نەبارى ەكىنشى ءىرى ۇتىلىسى: العاشقىسىندا ولار 1998 جىلعى فينالدا فرانتسيادان تاياق جەگەن ەدى (0:3). سونداي-اق، بۇل – جارتىلاي فينال كەزەڭىندەگى ەڭ ءىرى ەسەپ (6 دوپ ايىرماسى).

بۇل – كوماندالاردىڭ ءبىرىنىڭ تەپكەنى گول بولا بەرىپ، باعى جانعان، ەكىنشىسىنىڭ العا باسقان اياعى كەرى كەتىپ، ساعى سىنعان ويىن بولدى. ت.ميۋللەر سوققان العاشقى گول ءتىپتى دە مۇنداي سۇمدىق ناتيجەنىڭ باستاماسى بولىپ كورىنبەگەن-ءدى، برازيليالىقتار ودان كەيىن دە شاما-شارقىنشا قارسىلاسىپ باقتى. بىراق 23-29 مينۋتتار ارالىعىنداعى نەمىستەردىڭ كەرەمەت ويىنى ماتچ تاعدىرىن شەشىپ تاستادى. التى مينۋتتىڭ ىشىندە ولار ءتورت گول سوقتى! بۇل ساتتەردە برازيليانىڭ قورعانىسى مۇلدە ناشار وينادى. كرووس پەن حەديرا، ءوزىل مەن ميۋللەر ايىپ الاڭىنىڭ ىشىندە ەمىن-ەركىن پاس الماسىپ، ويلارىنا كەلگەنىن ىستەدى. مايتالماندار مايدا بالالارعا فۋتبول ساباعىن ۇيرەتكەندەي بولدى. برازيليالىقتار «ەكىنشى ماراكانازودان» قاۋىپتەنىپ جۇرگەندە، كۇتپەگەن جەردەن «مينەيراوزوعا» ۇشىرادى (ماتچ بەلۋ-وريزونتي قالاسىنداعى «مينەيراو» ستاديونىندا وتكەن ەدى).

گەرمانيا مەن كلوزەنىڭ رەكوردى

گەرمانيا قۇراماسى قاتارىنان ءتورتىنشى الەم چەمپيوناتىندا جارتىلاي فينالدا وينادى (رەكورد). جانە سەگىزىنشى رەت فينالعا شىقتى! بۇل دا – ءالى ەشكىم قول جەتكىزبەگەن كورسەتكىش. شابۋىلشى كلوزە بۇل ويىندا فينالدىق تۋرنيرلەردەگى 16-گولىن سوقتى. بۇل دا – رەكورد. ءبىر قىزىعى، برازيليالىق رونالدو مەرگەندىك جونىنەن نەمىس گ.ميۋللەردى 2006 جىلى گەرمانيادا قۋىپ جەتىپ، باسىپ وزسا، نەمىس كلوزە الگى رونالدونى... برازيليادا عانا ەمەس، سول برازيلياعا قارسى ويىندا قۋىپ جەتىپ، باسىپ وزدى.

گول سوعىلماعان ەكىنشى جارتىلاي فينالدا پەنالتي بويىنشا ارگەنتينا فۋتبولشىلارىنىڭ مەرەيى ۇستەم بولدى. «مينەيراوداعى» ماسقارادان سوڭ ەس جيا الماعان الاڭ يەلەرى سوسىن گوللانديا قۇراماسىنان تاس-تالقان بوپ جەڭىلىپ، قولا جۇلدەدەن دە قۇر قالدى.

ريو-دە-جانەيروداعى «ماراكانا» ستاديونىندا وتكەن فينالدا گەرمانيا فۋتبولشىلارى 1:0 ەسەبىمەن جەڭىسكە جەتتى. ناتيجە ءادىل ەدى. ارگەنتينالىقتار دوپقا نەبارى 36-اق پايىز ۋاقىت يەلىك ەتتى، قارسى قاقپاعا بىردە-ءبىر ءدال سوققى باعىتتاي العان جوق. راس، يگۋاين، مەسسي جانە پالاسيو گول سوعاتىن تاماشا مۇمكىندىكتەردى قۇر جىبەرىپ الدى. ال نەمىستەر بۇكىل فينال بويىنا باسىم وينادى. جالپى برازيليا جاسىل الاڭدارىندا گەرمانياداي جاقسى ويناعان كوماندا بولعان جوق دەسەك تە، ارتىق بولماس. اقىرى سول قاناتتان اندرە شيۋررلە بەرگەن پاستى شەبەر پايدالانعان جاس دارىن ماريو گەتتسە جەڭىس گولىن سوقتى. ەكەۋى دە – الاڭعا كەيىننەن شىققان ويىنشىلار ەدى. جالپى بۇل چەمپيوناتتا ماتچتى الاڭ جيەگىندە باستاپ، ويىنعا وقىستان كىرىسكەندەر ەرلەدى-اق: 171 گولدىڭ 31-ءىن سولار سوقتى!

بۇل – نەمىس فۋتبولىنىڭ تاريحىنداعى ءتورتىنشى تابىس ەدى. گەرمانيا قۇراماسى وڭتۇستىك امەريكا جەرىندە چەمپيون بولعان تۇڭعىش ەۋروپالىق كوماندا اتاندى. جالپى كەيىنگى ءۇش چەمپيوناتتا تەك قارت قۇرلىق قۇرامالارى تابىسقا جەتىپ كەلەدى: 2006 جىلى – يتاليا، 2010 جىلى – يسپانيا، 2014 جىلى – گەرمانيا...

ويىن ناتيجەلەرى

فينالدىق تۋرنيرگە 32 كوماندا قاتىستى.

64 ويىن وتكىزىلدى، 171 دوپ سوعىلدى (ورتا ەسەپپەن 2,67 گول).

«ا» توبى

برازيليا – حورۆاتيا – 3:1, مەكسيكا – كامەرۋن – 1:0, برازيليا – مەكسيكا – 0:0, كامەرۋن – حورۆاتيا – 0:4, كامەرۋن – برازيليا – 1:4,

حورۆاتيا – مەكسيكا – 1:3

«ۆ» توبى

يسپانيا – گوللانديا – 1:5, چيلي – اۆستراليا – 3:1, اۆستراليا – گوللانديا – 2:3, يسپانيا – چيلي – 0:2, اۆستراليا – يسپانيا – 0:3, گوللانديا – چيلي – 2:0

«س» توبى

كولۋمبيا – گرەكيا – 3:0, كوت-د'يۆۋار – جاپونيا – 2:1, كولۋمبيا – كوت-د'يۆۋار – 2:1, جاپونيا – گرەكيا – 0:0, جاپونيا – كولۋمبيا – 1:4, گرەكيا – كوت-د'يۆۋار – 2:1

«D» توبى

ۋرۋگۆاي – كوستا-ريكا – 1:3, انگليا – يتاليا – 1:2, ۋرۋگۆاي – انگليا – 2:1, يتاليا – كوستا-ريكا – 0:1, يتاليا – ۋرۋگۆاي – 0:1, كوستا-ريكا – انگليا – 0:0

«ە» توبى

شۆەيتساريا – ەكۆادور – 2:1, فرانتسيا – گوندۋراس – 3:0, شۆەيتساريا – فرانتسيا – 2:5, گوندۋراس – ەكۆادور – 1:2, ەكۆادور – فرانتسيا – 0:0, گوندۋراس – شۆەيتساريا – 0:3

«ع» توبى

ارگەنتينا – بوسنيا – 2:1, يران – نيگەريا – 0:0, ارگەنتينا – يران – 1:0, نيگەريا – بوسنيا – 1:0, نيگەريا – ارگەنتينا – 2:3, بوسنيا – يران – 3:1

«G» توبى

گەرمانيا – پورتۋگاليا – 4:0, گانا – اقش – 1:2, گەرمانيا – گانا – 2:2, اقش – پورتۋگاليا – 2:2, اقش – گەرمانيا – 0:1, پورتۋگاليا – گانا – 2:1

«ن» توبى

بەلگيا – الجير – 2:1, رەسەي – وڭت.كورەيا – 1:1, بەلگيا – رەسەي – 1:0, وڭت.كورەيا – الجير – 2:4, وڭت.كورەيا – بەلگيا – 0:1, الجير – رەسەي – 1:1

1/8 فينال

برازيليا – چيلي – 1:1 (پەن. 3:2), كولۋمبيا – ۋرۋگۆاي – 2:0, گوللانديا – مەكسيكا – 2:1, كوستا-ريكا – گرەكيا – 1:1 (پەن. 5:3), فرانتسيا – نيگەريا – 2:0, گەرمانيا – الجير – 2:1 (قوسىمشا ۋاقىتتا), ارگەنتينا – شۆەيتساريا – 1:0 (قوسىمشا ۋاقىتتا), بەلگيا – اقش – 2:1 (قوسىمشا ۋاقىتتا)

شيرەك فينال

فرانتسيا – گەرمانيا – 0:1, برازيليا – كولۋمبيا – 2:1, ارگەنتينا – بەلگيا – 1:0, گوللانديا – كوستا-ريكا – 0:0 (پەن. 4:3)

جارتىلاي فينال

برازيليا – گەرمانيا – 1:7, گوللانديا – ارگەنتينا – 0:0 (پەن. 2:4)

3-ورىن ءۇشىن ماتچ

برازيليا – گوللانديا – 0:3

فينال

گەرمانيا – ارگەنتينا – 1:0 (قوسىمشا ۋاقىتتا)

13 شىلدە. ريو-دە-جانەيرو. «ماراكانا». 74 738. تورەشى ريتستسولي (يتاليا).

گەرمانيا: نويەر، لام، بواتەنگ، حۋممەلس، حەۆەدەس، كرامەر (شيۋررلە، 31), شۆاينشتايگەر، كرووس، ءوزىل (مەرتەزاكەر، 120), ميۋللەر، كلوزە (گەتتسە، 88).

ارگەنتينا: رومەرو، سابالەتا، گاراي، دەميكەليس، روحو، بيليا، ماسكەرانو، پەرەس (گاگو، 86), مەسسي، لاۆەسسي (اگۋەرو، 46), يگۋاين (پالاسيو، 78).

گول: گەتتسە، 113.

ەسكەرتۋ العاندار: شۆاينشتايگەر، حەۆەدەس، ماسكەرانو، اگۋەرو.

سۇرمەرگەندەر

حامەس رودريگەس (كولۋمبيا) – 6 دوپ، توماس ميۋللەر (گەرمانيا) – 5.

ساكەن سىبانباي

Abai.kz