باسى: كەشىگىپ تۋعان كەرەمەت

جالعاسى: ءى چەمپيونات. 1960. كەڭەس فۋتبولىنىڭ التىن ءداۋiرi

جالعاسى: ءىى چەمپيونات. 1964. «قىزىل فۋريانىڭ» تۇڭعىش تابىسى

جالعاسى: ءىىى چەمپيونات. 1968. تەرىس تۇسكەن «تەڭگە»

جالعاسى: IV چەمپيونات. 1972. المانشا ارمان-كوماندا

جالعاسى: V چەمپيونات. 1976. سەگىز ساعاتقا سوزىلعان تۋرنير

جالعاسى: ءVى چەمپيونات. 1980. نەمىستەردىڭ ەكىنشى التىنى

جالعاسى: ءVىى چەمپيونات. 1984. ميشەل پلاتيني فەستيۆالى

جالعاسى: ءVىىى چەمپيونات. 1988. «عاسىر گولى» جانە عالامات فۋتبول

جالعاسى: ءىح چەمپيونات. 1992. «دات ءديناميتىنىڭ» ءدۇمپۋى

جالعاسى: ح چەمپيونات. 1996. فۋتبول ءوز ۇيىنە ورالدى

جالعاسى: ءحى چەمپيونات. 2000. شابۋىلدىڭ سالتاناتى

جالعاسى: ءحىى چەمپيونات. 2004. ەلليندەردىڭ ەرلىگى

جالعاسى: ءحىىى چەمپيونات. 2008. قىرىق ءتورت جىل كۇتكەن جەڭىس

تاريحتا تۇڭعىش رەت ەۋروپا چەمپيونى ءوز اتاعىن قورعاپ قالدى.

قولا جۇلدەگەر ءبىزدىڭ توپتان شىقتى

ءحىV ەۋروپا دوپ دوداسىنىڭ ىرىكتەۋ سىنىنا 51 قۇراما قاتىستى: التى توپتا – 6 كوماندادان، ءۇش توپتا – 5 كوماندادان. فينالدىق تۋرنير تاعى دا قوس ەلدە – پولشا مەن ۋكراينادا وتكىزىلدى، جارىسقا ول ەكەۋى كىرىسكەندە وسىدان ءتورت جىل بۇرىنعى رەكورد قايتا جاڭاردى – 53 (!) قۇراما قاتىسقان قۇرلىق چەمپيوناتى بۇعان دەيىن بولماعان-دى (بۇعان سەبەپ – بۇرىن سەربيا قۇرامىندا بولعان چەرنوگوريانىڭ تاۋەلسىزدىك الىپ، دەربەس ەلگە اينالۋى ەدى). توپ جەڭىمپازدارى شەشۋشى كەزەڭگە بىردەن شىقتى، ەكىنشىلەردىڭ ۇزدىگى دە سول قاتارعا قوسىلدى، ال قالعان 8 «ەكىنشى» جەرەبە ارقىلى ءتورت جۇپ ءتۇزىپ، فينالدىق ءتۋرنيردىڭ اقىرعى جولدامالارىن ساراپقا سالدى.

قازاقستان قۇراماسى تاعى دا 1-توپتا ونەر كورسەتتى. راس، الدىڭعى، العاشقى دودامەن سالىستىرعاندا، بۇل جولى فۋتبولشىلارىمىزدىڭ «كورسەتكەن ونەرى» كوڭىل كونشىتە قويعان جوق. ءوز الاڭىمىزدا ازەربايجاننان باسىم ءتۇسىپ (2:1), اۆستريامەن تەڭ وينادىق (0:0), باسقا ويىنداردىڭ بارىندە قىم-قيعاش جەڭىلۋمەن بولدىق: گەرمانيادان (0:3, 0:4), تۇركيادان (0:3, 1:2, شەشۋشى گولدى اردا تۇران 97-مينۋتتا سوقتى), بەلگيادان (0:2, 1:4), اۆستريادان (0:2, ەكى گولدى دا 90 مينۋت تۇگەسىلگەن سوڭ، تورەشى قوسقان قوسىمشا مينۋتتاردا جىبەرىپ العانىمىز وكىنىشتى) عانا ەمەس، باكۋدە دە ۇتىلدىق (2:3). توبىمىزدىڭ جەڭىمپازى گەرمانيا بولدى (فينالدىق تۋرنيردە جارتىلاي فينالعا دەيىن جەتىپ، قولا جۇلدەنى يەلەندى).

2-توپتان رەسەي، 3-توپتان يتاليا، 5-توپتان گوللانديا مەن شۆەتسيا، 6-توپتان گرەكيا، 7-توپتان انگليا، 9-توپتان يسپانيا ەشقانداي قيىندىقسىز شىقتى. 4-توپتا جەڭىمپاز سوڭعى ويىندا انىقتالدى: سەن-دەنيدە الاڭ يەلەرىن 1:0 ەسەبىمەن ۇتىپ تۇرعان بوسنيالىقتار 78-مينۋتتا پەنالتيدەن گول جىبەرىپ الدى دا، ەكىنشى ورىنعا سىرعىپ، فرانتسۋزدارعا جول بەرۋگە ءماجبۇر بولدى. 8-توپتا دا ءبىرىنشى ورىن ءۇشىن تالاس اقىرعى تۋرعا دەيىن سوزىلدى: ءوز الاڭىندا پورتۋگالدىقتاردى ۇتقان دانيا قۇراماسى جەڭىمپاز اتاندى.

شەشۋشى سىننىڭ قالعان جولدامالارىن ساراپقا سالۋعا مۇمكىندىك بەرەتىن ەكىنشى ورىندار ءۇشىن كۇرەس تە تارتىستى ءوتتى. قۇرلىق دوداسىنا تۇڭعىش قاتىسىپ وتىرعانىنا قاراماستان چەرنوگوريا فۋتبولشىلارى شۆەيتساريانى كەيىنگە ىعىستىرىپ، ءوز توبىندا ەكىنشى ورىن الدى. الايدا پلەي-وفف كەزەڭىندە چەحتاردان جەڭىلدى. بۇرىن ەش ارتىلىپ كوزگە تۇسپەگەن ەستونيا قۇراماسى سولتۇستىك يرلانديالىقتاردى دا، سلوۆەندىكتەردى دە، سەربتەردى دە سىرت الاڭدا تىزە بۇكتىرىپ، يتاليادان كەيىنگى ورىنعا كوتەرىلدى. بىراق سوڭىندا يرلانديادان ۇتىلدى. پلەي-وففتىڭ باسقا ماتچتارىندا حورۆاتتار تۇرىكتەردى، پورتۋگاليا بوسنيانى تىزە بۇكتىردى.

قاۋىم كورگەن گولدى... قازى كورمەپتى

چەمپيوناتتىڭ بەتاشار ويىنىندا دودا قوجايىندارىنىڭ ءبىرى – پولشانىڭ «گرەك جاڭعاعىنا» ءتىسى باتپادى (1:1). ءبىرىنشى تايمدا ءبىرشاما باسىمدىق بايقاتقان الاڭ يەلەرى 17-مينۋتتا ەسەپ اشتى. سول ۋاقىتتا دورتمۋندتىڭ «بورۋسسياسىندا» وينايتىن ۇشتىك ءوز دەگەنىن جاسادى: بلاششيكوۆسكي وڭ قاناتپەن وزا شاپقان پيششەككە پاس اسىردى، ونىڭ اۋەلەتىپ بەرگەن دوبىن لەۆاندوۆسكي تورعا ءدال باعىتتادى. تايم سوڭىندا يسپان تورەشىسى ۆ.كاربالو ەكى رەت قاتەلەستى: اسا دورەكى ويناماسا دا، پاپاستاتوپۋلوستى الاڭنان قۋدى، سوسىن پولياك پەركيستىڭ قولمەن ويناعانىنا قاراماستان، الاڭ يەلەرىنىڭ قاقپاسىنا 11 مەترلىك بەلگىلەگەن جوق. ال ويىنعا ەكىنشى تايمدا ارالاسقان سالپينگيديس لەزدە ماتچ قاھارمانىنا اينالا جازدادى. الدىمەن گرەك شابۋىلشىسى تارازى باسىن تەڭەستىردى، سوسىن قاقپاشىمەن جەكپە-جەك شىعىپ، ونى ايىپ الاڭىندا ءتارتىپ بۇزۋعا ماجبۇرلەدى. پەنالتي بەلگىلەندى جانە ششەسنى الاڭنان قۋىلدى. الايدا كاپيتان كاراگۋنيس تەپكەن پەنالتيدى قوسالقى قاقپاشى تىتون كەرى قايتاردى.

وسى «ا» توبىنداعى عانا ەمەس، جارىستاعى ەڭ جاسامىس كوماندا – رەسەي ءوزىنىڭ Euro تاريحىنداعى ەڭ ءىرى جەڭىسىنە قول جەتكىزدى (4:1). بىراق تۇبىندە شيرەك فينالعا ولار ەمەس، جەڭىلگەن چەحتاردىڭ شىققانى قىزىق بولدى. كەيىنگى ويىنداردا گرەكتەر مەن پولياكتاردان باسىم تۇسكەن چەحيا كۇتپەگەن جەردەن توپ جەڭىمپازى اتاندى. ال ەكىنشى ورىنعا شەشۋشى ويىندا ورىستاردى ۇتقان گرەكيا يە بولدى. كاراگۋنيس سوققان جالعىز دوپ ەۋروپا چەمپيوناتى فينالدىق تۋرنيرلەرىنىڭ تاريحىنداعى 550-گول ەدى.

«ۆ» توبىندا التىن تاجدەن دامەلى گوللانديا قارسى قاقپاعا 32 سوققى باعىتتاپ، رەكورد جاساسا دا، دانيادان ۇتىلىپ تىندى. 2010 جىلى الەمدىك دوپ دوداسىنىڭ فينالىندا ويناعان كوماندا سوسىن گەرمانيادان دا جەڭىلدى. تىلدى تاس قىپ بەكىتكەن نەمىستەر الاڭ ورتاسىندا دا بەلسەندى قيمىلداپ، قارسىلاسىنىڭ ويىن تىزگىنىن قولعا الۋىنا مۇمكىندىك بەرمەدى. وسىعان دەيىن كوپ سىنالعان شابۋىلشى گومەس ارىپتەسى شۆاينشتايگەر شىعارىپ بەرگەن ادەمى پاستاردى شەبەر پايدالانىپ، قوس دوپ سوقتى. گوللاند قۇراماسىنىڭ پورتۋگالدىقتارعا دا شاماسى كەلمەدى. الدىڭعى ەكى ويىندا قيمىلى كوڭىل كونشىتپەگەن كريشتيانۋ رونالدۋ بۇل جولى ءوزىنىڭ مەرگەن شابۋىلشى ەكەنىن ەلدىڭ ەسىنە قايتا سالدى. ءتۋرنيردى ءساتتى باستاعان دانيا بارلىق ويىندا دا قارسىلاسىمەن تايتالاسىپ باقتى، الايدا ءبارىبىر ءۇشىنشى ورىندا قالدى. ءۇش ماتچتا دا جەڭىسكە جەتكەن گەرمانيا قۇراماسى بولسا، شىنىندا دا ەۋروپا چەمپيوندىعىنان باستى ۇمىتكەردىڭ ءبىرى ەكەنىن بايقاتتى.

«س» توبىنداعى قوس مىقتى – يسپانيا مەن يتاليا كوز سۇيسىندىرەر كوركەم فۋتبول كورسەتىپ، ءوزارا تەڭ ءتۇستى (1:1). سوسىن ەۋروپا چەمپيوندارى يرلاندىقتاردىڭ جارىستى جالعاستىرۋدان ءۇمىتىن ءۇزىپ قانا قويماي، Euro تاريحىنداعى وزدەرىنىڭ ەڭ ءىرى جەڭىسىنە قول جەتكىزدى (4:0). وسىعان دەيىن تالاي ۇرىمتال ءساتتى ۋىستان شىعارىپ الىپ، مازاققا قالىپ كەلگەن فەرناندو توررەس ءوزىن سىناپ-مىنەۋشىلەرگە تاماشا گولدارىمەن جاۋاپ بەردى. حورۆاتتار ەرەكشە ەرىك-جىگەر تانىتىپ، وتە كۇشتى ويناعان يتاليا قۇراماسىنان ۇپاي جىرىپ الدى. جالپى بالقاندىقتار بارلىق ماتچتا دا باسا-كوكتەگەن وكتەم ءھام وتە جىگەرلى ويىن كورسەتتى. يرلانديانى ايقىن باسىمدىقپەن تىزە بۇكتىردى، يسپاندىقتارمەن سوڭعى مينۋتتارعا دەيىن تىرەسىپ باقتى.

«D» توبىندا فرانتسيا مەن انگليا ءىش پىستىرارلىق ويىندا ءوزارا تەڭ ءتۇستى (1:1). ۋكراينا – شۆەتسيا كەزدەسۋى اناعۇرلىم مازمۇندى ءوتتى. ماتچ الدىندا ەل «ويىن تاعدىرىن قوس كاپيتان – يبراگيموۆيچ پەن شەۆچەنكونىڭ قيمىلى شەشپەك» دەگەن-ءدى. راسىندا دا، سولاي بولدى، زلاتاننىڭ ءبىر گولىنا اندرەي ەكى دوپپەن جاۋاپ قايىردى. بۇل – Euro-نىڭ فينالدىق تۋرنيرىنە تۇڭعىش رەت قاتىسىپ وتىرعان ۋكراينا قۇراماسىنىڭ العاشقى گولدارى، العاشقى جەڭىسى ەدى. سونداي-اق 35 جاستاعى شەۆچەنكو – Euro تاريحىنداعى ءبىر ويىندا قوس دوپ سوققان ەڭ قارت فۋتبولشى.

ولەگ ءبلوحيننىڭ شاكىرتتەرى اعىلشىندارمەن دە تەرەزەسى تەڭ ونەر كورسەتتى. ءتىپتى شابۋىلشى دەۆيچ قارىمتا گول دا سوقتى. قاس قىلعاندا، قورعاۋشى تەرريدىڭ دوپتى قاقپا سىزىعىنان اسقان سوڭ بارىپ كەرى قايتارعانىن ستاديونداعى مىڭداعان، تەلەەكران الدىنداعى ميلليونداعان جانكۇيەر كورگەنىمەن، وسىنداي ساتتەردە الاڭداعى قازىنىڭ كوزى-قۇلاعى بولادى دەلىنگەن قاقپا ارتىنداعى قوسالقى تورەشى كورمەي قالىپتى! تارتىستى كەزدەسۋدىڭ تاعدىرىن شەشكەن جالعىز گولدى جازالانۋ مەرزىمى اياقتالعان سوڭ، بۇل تۋرنيردە الاڭعا العاش رەت شىققان رۋني سوقتى. بۇل – مىنەزى الاقۇيىن اعىلشىننىڭ فينالدىق سىنداعى 5-دوبى. ال يبراگيموۆيچ فرانتسيانىڭ قاقپاسىنا ءوزىنىڭ Euro تاريحىنداعى 6-گولىن ەنگىزدى. وكىنىشتىسى، ءتاپ-ءتاۋىر ويناعان شۆەدتەر ءبارىبىر توپ سوڭىندا قالدى.

دوپ قارشا بوراعان فينال

شيرەك فينالدا پورتۋگاليا قۇراماسى چەحيادان اناعۇرلىم باسىم وينادى. ولار قارسى قاقپاعا 20 سوققى باعىتتاسا (كريشتيانۋ رونالدۋدىڭ ءوزى ەكى رەت باعاناعا تيگىزدى), چەحتار تەك 2 سوققىمەن عانا جاۋاپ بەرە الدى. سوعان قاراماستان 79-مينۋتقا دەيىن ەسەپ 0:0 بوپ سىرەستى دە تۇردى. ءابۇيىر بولعاندا ويىننىڭ سوڭىنا تامان پورتۋگالدىق كاپيتاننىڭ جەكە شەبەرلىگى جەتەكشى ورىنعا شىعىپ، باسەكە تاعدىرىن شەشىپ كەتتى. گەرمانيا قۇراماسى 90 مينۋت بويىنا ويىن تىزگىنىن ءوز ۋىسىندا ۇستاپ، گرەكتەردى جەڭدى (4:2). يسپانيا فرانتسيانى وپ-وڭاي-اق تىزە بۇكتىردى (2:0, ەكى گولدى دا ءوزىنىڭ ۇلتتىق قۇراما ساپىنداعى 100-ماتچىن وتكىزگەن حابي الونسو ەنگىزدى). انگليا – يتاليا كەزدەسۋىندە ەسەپ سول كۇيى اشىلمادى، ال ماتچ سوڭىنداعى پەنالتي سەرياسىندا باسىمىراق ويناعان يتاليالىقتاردىڭ باعى جاندى.

ولاردىڭ جارتىلاي فينالداعى قيمىلى دا كوز ءسۇيسىندىردى. اسىرەسە كاسسانو مەن مونتوليۆونىڭ العى شەپتەگى بالوتەلليگە اسىرعان پاستارى – «پا، شىركىن!» دەۋگە تۇرارلىق. اعىلشىندارمەن كەزدەسۋدە بىرنەشە ۇرىمتال ءساتتى ۋىستان شىعارىپ العان شابۋىلشى بۇل جولى سالقىنقاندىلىق تانىتىپ، الگى پاستاردى اسقان شەبەرلىكپەن پايدالاندى. گەرمانيانىڭ ورتالىق قورعاۋشىلارى بۇل ويىندا وتە ءجيى قاتەلەستى. ەكى گول جىبەرىپ العان سوڭ، بۇكىل كوماندانىڭ ويىن ورنەگى بۇزىلدى. ال پورتۋگاليا ەۋروپا جانە الەم چەمپيوندارىمەن ارىستانشا الىستى. دوپ ادەتتەگىدەي يسپاندىقتاردىڭ اياعىندا كوبىرەك جۇرگەنىمەن، باسەكە تەڭ دارەجەدە ءوتتى. كريشتيانۋ رونالدۋ بۇل جولى ەشتەڭە جاساي المادى. «قىزىل فۋريانىڭ» گول سوعار ساتتەرىن ساناۋعا دا ءبىر قولدىڭ ساۋساقتارى جەتەر ەدى. اقىرى 0:0 بوپ بىتكەن ماتچتىڭ تاعدىرىن پەنالتي سەرياسى شەشتى. فۋتبولشىلاردىڭ بابىن عانا ەمەس، باعىن دا سىنايتىن سىناق بارىسىندا قاقپاشىلار ءبىر-بىردەن سوققى قايتاردى، پورتۋگالدىق برۋنۋ الۆەشتىڭ تەپكەن دوبى ماڭدايشانى سولق ەتكىزدى، ال شەشۋشى ساتتە جاۋاپكەرشىلىكتى ءوز موينىنا العان فابرەگاس قاقپانى ءدال كوزدەپ، كومانداسىن فينالعا الىپ شىقتى.

قىزىقتى وتكەن چەمپيوناتتىڭ شەشۋشى ماتچى دا كوز قۋانتىپ، كوڭىل ءسۇيسىنتتى. مۇنداي ءىرى ەسەپ قۇرلىق دوداسى فينالدارىندا بولىپ كورگەن ەمەس. بىراق ناتيجەگە قاراپ، يتاليا وتە ناشار وينادى دەۋدىڭ ءجونى جوق. ءبىرىنشى تايمدا، جالپى 60-مينۋتقا دەيىن «سكۋادرا ادزۋررا» «قىزىل فۋرياعا» لايىقتى قارسىلاس بولا ءبىلدى. الايدا ماتچ باسىندا-اق كەلليني جاراقات الدى، شابۋىلدى كۇشەيتۋ ءۇشىن ۇزىلىستە تاعى ءبىر ويىنشى الماستىرىلدى. كوپ ۇزاماي باپكەر الاڭعا تياگو موتتانى دا شىعاردى. ول ءۇش-ءتورت مينۋت قانا وينادى دا، اۋىر جاراقات الىپ، ساپتان شىعىپ قالدى. امال جوق، يتاليا اقىرعى جارتى ساعاتتا ون-اق فۋتبولشىمەن وينادى.

دەگەنمەن يسپانيانىڭ ءىرى جەڭىسىن تەك قارسىلاس ساپىنداعى قيىندىقتارمەن عانا ءتۇسىندىرۋ دۇرىس بولماس ەدى. «قىزىل فۋريا» فينالدا ءوزىنىڭ كەيىنگى جىلدارداعى ەڭ تاماشا ويىنىن كورسەتتى. اسىرەسە ءتورت گولدىڭ سوعىلۋىنا ءوز ۇلەستەرىن قوسقان «پاس پاديشالارى» – حاۆي مەن ينەستا ەرەكشە كوزگە ءتۇستى. ولار عانا ەمەس، شەشۋشى ساتتە دوپتى ءوزى سوعا سالماي، اپانداي قاقپانىڭ الدىندا اشىق تۇرعان ماتاعا ىڭعايلى پاس بەرگەن توررەس، شابۋىلشى «ماماندىعىن» مەڭگەرگەن «جالعان توعىزدىق» فابرەگاس، قورعانىستى مىعىم ۇستاعان سەرحيو راموس، 6 ويىندا ءبىر-اق گول جىبەرگەن كاسيلياس سىندى شەبەرلەر دە ريزا ەتتى. يسپان جانكۇيەرلەرىنىڭ كوپتىگىنەن، جالپى كۇللى الەمنەن جينالعان فۋتبول اۋەسقويلارىنىڭ مەرەكەلى دۋمانىنان كونە كيەۆ دۇرىلدەي تەڭسەلىپ تۇردى.

تۇڭعىش رەت ەۋروپا چەمپيونى ءوز اتاعىن قورعاپ قالدى. وسى ەكى قۇرلىق دوداسىنىڭ اراسىندا الەم چەمپيونى دا بولعان يسپانيا فۋتبول تاريحىندا تەڭدەسى جوق ناتيجەگە قول جەتكىزدى. باس باپكەر ۆيسەنتە دەل بوسكە ءارى الەمدىك دوپ دوداسىن، ءارى ەۋروپا چەمپيوناتىن، ءارى چەمپيوندار ليگاسىن ۇتقان بىردەن-ءبىر مامان اتاندى.

ءحىV ەۋروپا چەمپيوناتى

(2012 جىل، پولشا/ۋكراينا)

فينالدىق تۋرنير

«ا» توبى

پولشا – گرەكيا – 1:1, رەسەي – چەحيا – 4:1, گرەكيا – چەحيا – 1:2, پولشا – رەسەي – 1:1, گرەكيا – رەسەي – 1:0, چەحيا – پولشا – 1:0.

1. چەحيا 3 4:5    6
2. گرەكيا 3 3:3    4
3. رەسەي 3 5:3    4
4. پولشا 3 2:3    2

«ۆ» توبى

گوللانديا – دانيا – 0:1, گەرمانيا – پورتۋگاليا – 1:0, دانيا – پورتۋگاليا – 2:3, گوللانديا – گەرمانيا – 1:2, دانيا – گەرمانيا – 1:2, پورتۋگاليا – گوللانديا – 2:1.

1. گەرمانيا 3 5:2    9
2. پورتۋگاليا 3 5:4    6
3. دانيا 3 4:5    3
4. گوللانديا 3 2:5    0

«س» توبى

يسپانيا – يتاليا – 1:1, يرلانديا – حورۆاتيا – 1:3, يتاليا – حورۆاتيا – 1:1, يسپانيا – يرلانديا – 4:0, يتاليا – يرلانديا – 2:0, حورۆاتيا – يسپانيا – 0:1.

1. يسپانيا 3 6:1    7
2. يتاليا 3 4:2    5
3. حورۆاتيا 3 4:3    4
4. يرلانديا 3 1:9    0

«D» توبى

فرانتسيا – انگليا – 1:1, ۋكراينا – شۆەتسيا – 2:1, ۋكراينا – فرانتسيا – 0:2, شۆەتسيا – انگليا – 2:3, شۆەتسيا – فرانتسيا – 2:0, انگليا – ۋكراينا – 1:0.

1. انگليا 3 5:3    7
2. فرانتسيا 3 3:3    4
3. ۋكراينا 3 2:4    3
4. شۆەتسيا 3 5:5    3 

شيرەك فينال

چەحيا – پورتۋگاليا – 0:1, گەرمانيا – گرەكيا – 4:2, يسپانيا – فرانتسيا – 2:0, انگليا – يتاليا – 0:0 (پەنالتيدەن 2:4).

جارتىلاي فينال

پورتۋگاليا – يسپانيا – 0:0 (پەنالتيدەن 2:4), گەرمانيا – يتاليا – 1:2.

فينال

يسپانيا – يتاليا – 4:0

1 شىلدە. كيەۆ. وليمپيالىق ستاديون. 63 170 كورەرمەن. تورەشى پروەنسا (پورتۋگاليا).

يسپانيا: كاسيلياس، اربەلوا، پيكە، سەرحيو راموس، البا، بۋسكەتس، حابي الونسو، حاۆي، ينەستا (ماتا، 86). سيلۆا (پەدرو، 59), فابرەگاس (توررەس، 75).

يتاليا: بۋففون، اباتە، باردزالي، بونۋچچي، كەلليني (بالدزارەتتي، 21), دە روسسي، پيرلو، مونتوليۆو (تياگو موتتا، 56), ماركيزيو، كاسسانو (دي ناتالە، 46), بالوتەللي.

گولدار: سيلۆا، 14 (1:0). البا، 41 (2:0). توررەس، 84 (3:0). ماتا، 88 (4:0).

ەسكەرتۋ العاندار: پيكە، باردزالي.

ساكەن سىبانباي

Abai.kz